Introdusaun
Hanesan ita hotu hatene katak direito FM hamrik atu sai edukador, informador, fatin ba mediasaun no advosia nian ne’e ho nia programa foka ba Educasaun civika iha area direitus umano, lei no justisa iha Timor Lorosae. Iha programa hirak nebe sai hanesan mata dalan, direito FM mos uza metodu barak hodi anima nia audensia sira. Metodo nebe atu uza ba progama ne’e mak debate publiko no Direito FM sei transmisi direita ba nia audensia sira.
Organizasaun artes no ritual marsiais hanesan mos kapital sosial ida ba prosesu dezenvolvementu nasaun. Natureza organizasaun nudar organizasaun artes no desportu sai hanesan rekursu importante ida haforsa dezenvolvimentu umana iha Timor-Leste. Maske iha realidadi individual sira nebe involve iha organizasaun hirak ne’e laiha kapasidade ne’ebe balansu para atu aplika talentu sira ne’e.
Iha tinan 2006-2008 krizi ne’ebe mak mosu dau-daun iha Timor-Leste nian laran tomak liu-liu iha Capital Dili, organizasaun artes ritual mariais sira mak sai hanesan elementu ativu ba konflito no violensia iha bairo-sira iha Dili no distritu-sira seluk. No, fo impaktu maka’as ba komunidade ninia moris ne’ebe tauk no traumatik. Alende ida ne’e organizasaun hirak ne’e, tuir ita nia hatene katak uluk sira unidade tebes tamba dala ruma individual sira involve iha membru ba organizasaun sira ne’e sei iha relasaun familia ka sei kolegas intimu.
Nudar organizasaun ida ne’ebe konsidera existensia organizasaun artes-ritual marsiais sira iha Timor-Leste hanesan kapital ba dezenvolvimentu ninian. Nune, hakarak halo programa ida ne’e liuhosi servisu hamutuk entre ITA BA PAZ ho Radio Direitu FM nian, hakarak hato’o-ba publiku hodi transforma persepsaun negativu sira mak prega ba organizasaun hirak ne’e.
VIII. Konaba ITA BA PAZ
Institutu Timor-Oan Estudu Paz no Transformasaun Sosial (Timorese Institute for Peace & Social Transformation Study) ho naran badak ITA BA PAZ nudar fundasaun ida mak independenti no laos organizasaun lukru. ITA BA PAZ estabelese bazeia ba dezisaun Konsellu Board HAK ninian data 29 Dezembru 2009 hodi responde ba komitmentu Asosiasaun HAK ninian iha area transformasaun konflitu no harii paz iha Timor-Leste. Tamba esperiensia konflitu violensia ne’ebe akontese, iha kontestu nasaun foin sai husi konflitu (post conflict nation).
Hanesan difinidu iha estatutu, ITA BA PAZ ninia vizaun mak kria estrutura no transforma mentalidadi entidadi sosial juventude no artes ritual marsiais ne’ebe ativu, responsivu no partisipativu promove paz ne’ebe realistiku, justu no sustentabel. Atu hetan vizaun ida ne’e, nune ITA BA PAZ sei hala’o misaun hirak tuir mai ne’e: a) transforma potensia no rekursu joven ho elementu organizasaun artes & ritual marsiais hodi sai nudar ajenti ativu harii paz iha sosiedadi, b) Habelar prinsipiu no valores paz ninian ba sosiedadi liuhusi papel joven no organizasaun artes & ritual marsiais sira, no c) Hametin kooperasaun besik entre entidadi sosio politiku no kultura iha sosiedadi Timor-Leste no ho komunidadi internasional ba esforsu prevensaun konflitu no promove paz ne’ebe realistiku, justu no sustentabel;
Misaun ITA BA PAZ ne’e rasik sei atinji liuhosi realizasaun objetivu prinsipal mak hanesan tuir mai ne’e: 1) Juven no organizasaun artes ho ritual marsiais sira sai ajenti ativu harii paz liuhusi ativu iha asaun violensia laek, 2) Joven no organzasaun artes & ritual marsiais sira adopta no habelar valores-sira violensia-laek iha pratika vida moris pesoal iha uma kain, komunidadi no nasaun laran, 3) Joven no organizasaun arte no ritual marsiais sira sai parseiru ba orgaun estadu-guvernu, sosiedadi sivil no ajenti internasional sira iha prosesu dezenvolvimentu no harii paz iha Timor-Leste;
ITA BA PAZ deklara hamrik iha data 05 fulan Maiu 2009 iha Aula Asosiasaun HAK Farol, Dili Timor-Leste. No, lidera husi lideransa no staf sira balun ne’ebe servisu iha programa transformasaun konflitu no harii paz durante ne’e iha HAK. ITA BA PAZ hamrik iha ninia vizaun, misaun no objetivu-rasik mak “Hakarak realiza sosiedadi Timor-Leste ne’ebe moris iha ambiente paz no goza liberdadi pesoal, kaer-metin identidadi sosiu-kultural, ativu no partisipativu no respeitu direitus humanus. Atu lori-vizaun ne’e sai iha realidadi, ITA BA PAZ sei hala’o misaun hirak; a) transforma potensia no rekursu joven ho elementu artes & ritual marsiais hodi sai nudar ajenti ba mudansa no hari’i paz; b) liuhosi estudu no edukasaun konaba paz hodi adopta prinsipiu no valores ativu violensia-laek, no; c) hametin parseria ho autoridadi estadu ba moris paz ne’ebe justu, realistiku no sustentabel iha Timor-Leste”.
Atu lori misaun hirak ne’e sai realidadi, nune ITA BA PAZ sei atinji objetivu xave tolu mak hanesan tuir mai ne’e:
1) Juven no organizasaun artes ho ritual marsiais sira sai ajenti ativu hari’i paz liuhusi ativu iha asaun violensia-laek;
2) Iha kapasitasaun ba joven no elementu organizasaun liuhosi prosesu transferensia abilidadi no matenek;
3) Joven no organizasaun arte no ritual marsiais sira sai parseiru ba orgaun estadu-guvernu, sosiedadi sivil no ajenti internasional sira iha prosesu harii paz no solidaridadi;
Objetivu;
1) Objetivu Jeral: Programa ida ne’e hakarak halo transformasaun ba persepsaun-sira hosi publiku konaba existensia organizasaun artes-ritual marsiais ne’ebe konsidera nudar elementu konflitu violensia hodi sai fali nudar ajenti ba transformasaun sosial no harii paz iha sosiedadi liuhosi ezersisiu artes no desportivu;
2) Objetivu espesifiku-sira:
a) Liu hosi programa ida ne’e publiku bele hetan no hatene susesu ruma relasiona ho lalaok organizasaun artes-ritual marsiais durante ne’e;
b) Hadia relasaun no hametin unidade nebe uluk iha ona e depois naksobu tiha;
c) Reorganiza fila fali organizasaun sira nebe durante ne’e involve iha konflitu
d) Hari konfiansa ba malu hodi promove paz no dame nudar apoiu ida ba prosesu dezenvolvementu.
Metodu
1) Husu no hata’an
2) Hanoin-lisuk
3) Mensajen Edukasional hodi promove paz
THEMA;
HARI’I PAZ LIUHOSI EZERSISIU ARTE MARSIAIS IHA TIMOR-LESTE
Data Oras Fatin
09 de Junhu 2009 17:00-18:00 Aula HAK,
Moderador Edio Ho Quim
Lia Nain
Pedro Aparicio,Porta Voz PSHT
Jose Cardoso,Lideransa Kmanek Oan Rai-Klaran (KORK)
Ernesto Gusmaó,Padjadjaran
Martinho Gusmao,Lideransa IKS-PTL Kera Sakti
Costodio da Silva,Presidenti Perisai Diri
Gracindo Abril,Rajawali Seruling Dewata
Joào Fernandez, Rajawali Putih
Peritus/Observador
Aniceto Guro-Berteni Neves, Prezidente Festil
Silveiro Baptista Pinto,Adjunto Provedoria Dos Direitus Humanus no Justisa
Firminio Diaz,Prezidenti Komisaun Reguladora Artes Marsiais Timor-Leste
Pergunta geral.Ba Arte Masiais Sira :
Existensia organizasaun arte-marsiais iha Timor-Leste hasoru dilema enkuantu iha mudansa bo’ot hosi situasaun nudar sosiedadi kolonizadu ba iha situasaun tranzitoriu ida molok sai nudar sosiedadi Ukun Rasik A’an (URA). Existensia organizasaun hirak ne’e iha momentu Indonezia nia tempu burak no dezenvolvidu tuir natureza no karakteristiku organizasaun nian hanesan “artes & desportu”.
Iha tinan 2006, no tempu balun molok ida ne’e, elementu organizasaun hirak ne’e sai potensia ba konflitu violensia iha komunidadi ninia le’et. Tuir konstituisaun RDTL, existensia organizasaun hirak ne’e nudar manifestasaun hosi ezersisiu direitu fundamental sidadaun nian konaba liberdadi harii organizasaun no asosiasaun. Hosi aspeitu sosiu-kultural organizasaun ninian, artes marsiais nudar kapital ba dezenvolvimentu nasional ida. Foin iha Dezembru 2009, organizasaun arte marsiais hirak ne’e organiza a’an liuhosi Federasaun Silat Timor-Leste (FESTIL).
Iha momentu diskusaun ida ne’e, iha pontu interogasaun ruma refleta hosi situasaun atual agora daudaun ne’e: 1) Oinsa organizasaun sira ne’e dezenvolve iha tempu URA ne’e ninia laran, 2) Situasaun no realidadi agora ne’e sai nudar oportunidadi no obstaklu dala ida deit ba organizasaun sira, 3) Oinsa existensia organizasaun hirak ne’e ninia ligasaun ho instituisaun no politika Guverno-TL iha tempu agora no iha futuru oin-mai? No 4) Oinsa atu transforma persepsaun sosiedadi ninian konaba organizasaun arte marsiais nudar elementu konflitu violensia muda fali tuir natureza nudar artes * desportu hodi kontribui ba transformasaun sosial no harii paz iha Timor-Leste?
Pergunta ba Presidente FESTIL Sr Aniceto Neves
FESTIL nudar orgaun mahon ba organizasaun artes marsiais “Silat” iha Timor-Leste. Existensia FESTIL simu konfiansa todan ida atu bele lori organizasaun sira mak sai membru ba FESTIL ne’e hodi lao tuir ninia natureza no karakteristiku “Artes & Desportu” hodi kontribui ba transformasaun sosial no harii paz. Nune, iha mos pontu interogativu lubun ida ne’ebe sai servisu ba FESTIL, 1) Oinsa FESTIL hare’e-ba situasaun no realidadi sira mak organizasaun membru FESTIL nia infrenta, 2) Saida mak sai nudar asaun konkrit hosi FESTIL nudar organ mahon ba organizasaun artes marsiais hirak ne’e, 3) Estratezia saida mak FESTIL sei hala’o hodi bele tau organizasaun hirak ne’e tuir sira nia natureza no karateristiku nudar organizasaun artes no desportu iha Timor-Leste, 4) Oinsa FESTIL bele transforma existensia organizasaun membru-sira ne’e hosi persepsaun nudar elementu ba konflitu violensia hodi sai nudar ajenti ba harii paz?
Pergunta ba Provedor Direitus Humanos Sr. Silverio B.
Iha preukupasaun oin-oin konaba existensia organizasaun artes marsiais iha Timor-Leste. Liu-liu refleta ba situasaun real no aspeitu lejitimidadi organizasaun sira nian. Tamba ne’e, liuhosi diskusaun ne;e, importante atu fo atensaun ba pontu interogasaun hirak tuir mai ne’e:
6) Oinsa existensia organizasaun arte marsiais iha Timor-Leste hosi aspeitu direitus humanus?
7) Karik iha potensialidadi atu dezenvolve organizasaun artes marsiais hirak ne’e atu promove paz, respeitu direitus humanus iha Timor-Leste?
8) Konaba involvimentu elementu organizasaun sira iha krizi 2006 ne’e, oinsa hare’e hosi aspeitu responsabilidadi nudar pesoal/individu ida no-mos nudar membru organizasaun artes marsiais tuir lei iha Timor-Leste?
9) Saida mak sai nudar obstaklu ba organizasaun artes marsiais hirak ne’e atu dezenvolve hodi sai nudar ajenti ba dezenvolvimentu?
10) Karik iha posebilidadi atu transforma persepsaun publiku ba organizasaun hirak ne’e nudar elementu ba konflitu violensia ba fali nudar ajenti harii paz? Oinsa?
Pergunta ba Presidente Comite Reguladora Artes Marsiais, Sr.Ferminio Diaz
Krizi 2006 liuba ne’e bolu atensaun seriu Guvernu Timor-Leste ninian konaba existensia organizasaun artes marsiais sira iha Timor-Leste. Tamba ne’e, Guverno-TL hamosu rezime legal hodi regula existensia no atividadi organizasaun hirak ne’e. Liuhosi diskusaun ida ne’e, importante atu re-afirma politika Guverno-TL nian. Tamba ne’e presija iha espasu ida hodi bele: 1) Iha esplikasaun konaba razaun Guvernu Timor-Leste hasai Dekretu Lei no. 10/2008 hodi regula ezersisiu organizasaun arte marsiais iha Timor-Leste, 2) Dekretu Lei no. 10/2008 ne’e regula saida-deit, 3) Depois Dekretu Lei ne’e tama iha vigor, saida mak sai nudar obrigasaun Guvernu TL ba dezenvolvimentu organizasaun arte marsiais hirak ne’e? No, 4) Apoiu konkrit ida oinsa mak Guvernu sei halo hodi dezenvolve organizasaun artes-ritual marsiais hirak ne’e lao tuit natureza no karakteristiku artes no desportu iha Timor-Leste?
