Servisu Hamutuk Direito FM ho Movimento Hakbi't Direitos Humanos Ass.HAK
I. Lian Maklokek
Hanesan públiku tomak hatene, katak isforsu Ministériu hot-hotu inportante hodi hakonu sosiedade Timor-Leste ninia moris di’ak tuir komprimentu ne’ebé mak hatu’ur metin iha Konvensaun Direitu Ekonómia, Sosiál no Kultura. Hanesan estadu parte ba tratadu ne’e, durante tinan barak governu ho ninia isforsu tomak halo duni sasan barak atu kompri obrigasaun hanesan estadu parte ba tratadu ne’e.
Husi isforsu hirak ne’e, ema barak mós sei dauk hatene katak isforsu ne’ebé mak kada Ministéru halo to’o ona iha ne’ebé, sa ida mak halo ona no sa ida mak sei dauk? Pergunta ida ne’e mak halo ami iha NGOs mós susar atu hatan. Tan ne’e ami hanesan organizasaun ne’ebé haknar-an iha áreia deiretu umanus, liu-liu oinsa mak kada sidadaun ida bele hetan ninia direitu ba moris di’ak. Dalan ida ne’e, ami konsinti katak, dalan ne’e mak Ministériu 4 hala’o dau-daun mak hanesan; Ministériu Agrikultura i Peska, ho ninia polítika intensifikasaun no eksténsifikasaun ho intensaun oinsa mak bele hasae’e produsaun agíkula Timor-Leste nian.
Ministériu Dezenvolvimentu Ekonómia, ministériu ne’e isforsu maka’as oinsa halo planu no forma koperativas iha distritus hodi nune’e komesa ona hahú halibur produtus hirak ne’ebé mak ita ninia Ministériu Agrikultura i Peskas produs tiha ona. Wainhira produsaun hirak ne’e konsege halibur hotu ona no tau ka rai didi’ak ona iha armajen i hein katak Ministériu Tuirzmu Comersiu Indústria ho ninia polítika “Povu Kuda, Governu Sosa” hahú opera dau-dauk ona ninia rekursu hodi ba sosa ka foti ai-han hirak ne’ebé mak kada koperativa organiza tiha ona iha armajen hirak iha Distritu hodi halo distribuisaun ba komunidades hirak ne’ebé mak menus ai-han (husi impaktu ambientál). Ministériu Edukasaun, ne’ebe isforsu maka’as oinsa alumlus husi ensinu primária sira bele hetan merenda eskolár hodi nune’e labarik ki’ik sira ne’e la hamlaha wainhira simu lisaun husi sira ida-idak nia profesor/a iha eskola wainhira to’o tempu atu fila ba uma.
Tanba informasaun ba ami menus teb-tebes sobre liña koordenasaun entre Ministérial hanesan ami temin ona iha leten, tan ne’e simplismente ami interpreta liña koordenasaun hanesan ami reve ona iha leten. Bajeia ba informasaun ne’ebé ami hetan limitadu teb-tebes, hodi hamosu interpretasaun katak entre Ministériu 4 ne’e sei dauk iha lia fuan ne’ebé hanesan, tan ne’e sei mosu nafatin dúvida katak wainhira lós mak sosiedade Timor-Leste atu to’o lolos moris di’ak ne’ebé rohan laek.
Ho informasaun ne’ebé limitadu, dala ida tan ami hakarak reve katak, ami iha nafatin dejeju, iha futuru entre Ministériu 4 ne’e, sei la’o hamutuk ba hatan lisuk ba mehi sosiedade Timor-Leste nian ba moris di’ak hodi kore sira nia-an husi mukit, ki’ak, an-alfabetu no izoladu. Liu husi hakbi’it sira ninia matenek ne’ebé iha nanis hodi produz ai-han liu husi meus koperativas, hodi nune’e sira bele aumenta rendimentu atu nune’e bele sai sosiedde ida ne’ebé forti hanesan mós sosiedade iha rai seluk. Sosiedade ida ne’ebé forti, signifika katak, sosiedade ne’e la lakon espíritu inovadór, espíritu kreativu no espíritu produtivu ne’ebé moris no buras nafatin iha ita nia sosiedade.
II. Objektivu
• Hetan informasaun kle’an sobre liña koordenasaun entre Ministériu 4 hodi hatutan tan informasaun ne’e ba públiku hodi nune’e, sosiedade Timor-Leste bele informadu atu nune’e sira bele badinas hodi hasa’e sira ninia rendimentu hodi bele hadi’a sira nia moris i bele to’o meta, moris iha prosperidade nia laran.
• Produtór (Agrikultór, Peskadór, Artezenatu, Pastóralistas no Karpentária) la senti knár ne’ebé mak sira hala’o dau-dauk, hanesan folin la’ek.
• Hametin liu tan relasaun entre NGOs ho governu hodi la’o hamutuk hanesan parseru ba dezenvolvimentu nasionál.
III. Oradór
1. Exmo. Ministru Agrikultura no Peskas (Ir. Mariano Assanami Sabino)
Sei koalia konabá: Iha ka la’e polítika konabá assosiasaun ba agrikultór no peskadór, oinsa ninia ligasaun ho polítika koperativa ne’ebé mak Ministériu Dezenvolvimentu Ekónomia kria tiha ona?
2. Exmo. Ministru Dezenvolvimentu Ekonómia (DR. João Gonçalves)
Sei Koalia konabá: Polítika Forma Koperativas oinsa ninia ligasaun ho polítika assosiasaun ba agrikultura no peskas nune’e mós ligasaun ba polítika “povu kuda governu sosa”?
3. Exmo. Ministru Edukasaun (DR. João Cansio Freitas)
Sei Koalia konabá: Polítika Merenda Eskolar, oinsa ninia korelasaun ho Ministériu tolu seluk (MAP, MED no MTCI?)
4. Exmo. Ministru Turizmu Comérsiu Industria (DR. Gil Alves)
Sei koalia konabá: oinsa atu implementa polítika povu kuda governu sosa, dalan ne’e mak hanesan sa ida, no oinsa ninia ligasaun ho Ministériu 3 seluk (ME, MTCI no MAP?)
5. Exmo. Prezidenti Komisaun D, Parlamentu Nasionál (Dra. Brigida A. Correia)
Sei Koalia konabá: Oinsa implementasaun ba polítika ezekusaun orsamentu iha korelasaun ho planu programa ne’ebé mak hetan aprovasaun husi Parlamentu Nasionál?
6. Direitór Fundasaun HABURAS (Sr. Deometrio Amaral)
Sei koalia konabá: Observasaun Jerál ba inplementasaun polítika inter Ministeriál sobre dezenvolvimentu Ekonómia iha Timor-Leste hanesan obrigasaun estadu parte ba konvensaun Direitu Ekonómia, Sosiál & Kultura
IV. Partisipantes
Agrikultó, Peskadór, NGOs, Estudantes Universitáriu no Joventude
V. Tempu no fatin
• Dia 30 fulan Setembru 2010
• Aula Perkumpulan HAK, Farol-Dili
• Oras : 09:00 to’o ramata
VI. Lian Maktakak
Ami espenta katak, ho diskusaun ida ne’e, bele hodi informasaun foun ba Agrikultóres, Peskadóres ONGs, Estudantes no públiku. Hodi nune’e komponentis hotu bele partisipa ativu iha prosesu dezenvolvimentu Nasionál atu nune’e bele to’o ninia meta moris di’ak ne’ebé rohan laek.
To’o ba ne’e deit ToR ida ne’e ami hato’o ba ita, ba ita bo’ot nia atensaun no informasaun murak, la haluha ami hato’o obrigado barak.
Ami hein,
Díli, 15 Setembru 20010
Ami ne’ebé saran lia Koiñesementu
Manuel Monteiro F.
Prog. Manejer. Div.H.M.D.H
