“ONU no Indonesia tenke hatudu responsabilidade legal suporta programa reparasaun vitima Iha Timor Leste no kolaborasaun diak ba rezolve kazu ema lakon obrigatoriu”
I. Introdusaun
Nudar organizasaun nebe servisu ba promove no proteze direitus umanus iha nasaun Timor Leste, Asosiasaun HAK regularmente sempre komemora loron mundial direitus umanus iha kada loron 10 fulan Dezembru. Ba komemorasaun tinan 2010 ne, Asosiasaun HAK sei halao aktividade importante rua hanesan komfrensia da impprensa nebe sei halao iha loro 9 fulan Dezembru 2010, no sei publika relatoriu sobre Timor Leste nia kondisaun direitus umanus tinan 2010 iha fulan Janeiru tinan 2011.
Timor Leste asina tiha ona konvensaun internasional direitus umanus 7 (hitu) desde tinan 2002 kotuk. Depois de ratifika tiha konvensaun hirak ne, dever balun nebe Timor Leste tenke kumpri no implementa mak adopta konvensaun hirak ne sai lei aplikavel sira no dezenvolve mekanismu ba implementasaun dever tomak husi konvensaun hirak ne. Iha ne mak Asosiasaun HAK nia kna’ar dudu stadu Timor Leste halao implementasaun diak ba dever sira ne tuir padraun internasional nebe adopta husi konvensaun sira ne hotu.
Knar dudu stadu Timor Leste refere halao liu husi aktividade sira hanesan hasae autoridade implementador lei sira nia kapasiidade no kunhesiementu ba lei no direitus umanus, halo intervensaun litigasi no non litigasi ba kazu violasaun direitus uamnus nebe involve autoridade ka instituisaun stadu nian hanesan PNTL, monitoriza regularmente intituisaun judisairu sira nia lalaok no servisu, hahu husi instittuisaun PNTL, Ministeriu Publiku, no mos Tribunal sira, no monitoriza implementasaun programa dezenvolvimentu iha nivel nasional, distrital, to nivel Suku no Aldeia.
Aktividade hirak ne mak fasilita ka kondisiona Asosiasaun HAK hetan dadus no informasaun oin-oin kona ba Timor Leste nia kondisaun direitus umanus iha kada tinan, inklui ba tinan 2010 nebe sei publika nia relatoriu kompletu iha fulan Janeiru tinan 2011. Iha konfrensia imprensa ida ne, Asosiasaun HAK sei hato’o deit pontus importante balun husi kontiudu relatoriu refere. Pontus importante sira ne’e kobre rezultadu HAK nia observasaun durante tinan 2010 ba situasaun direitu sivil politika balun, no situasaun direitu ekonomia, sosial, no kultura balun.
II. Kondisaun Direitus Umanus Timor Leste Tinann 2010
Kondisaun direitus umanus Timor Leste tinan 2010 fahe ba realidade rua. Realidade primeiru hatudu stadu timor leste liu husi desizaun politika, administrativu dan lei halo dadauk esforsu barak hodi promove no proteze sidadaun sira nia direitus umanus. Realidade segundu hatudu esforsu sira ne, balun seidauk hatudu progresu diak tamba ladun hetan atensaun diak husi parte sira nebe iha kompetensia legal no politika atu dudu esforsu sira ne bele lao lalais no lao diak liu tan.
Asosiasaun HAK nota progresu diak balun mak hanesan Timor Leste adopta tiha ona lei kontra violensia domestika, lei protesaun ba sasin, kodegu prosesu penal no kodegu penal. Lei sira ne sai baze legal ba esforsu legal hamenus kazu violasaun direitus umanus no kazu krimi sira. Progresu diak seluk mak parlementu nasional iha tinan 2010 aprova jeneralidade tiha ona lei reparasaun vitima no lei instituisaun memorial. Ne hatudu Timor Leste hahu promove dadauk direitu vitima husi kazu krimi grave no kazu krimi kontra umanidade nebe akontese durante tinan 1975 to 1999.
1. Dezafiu ba Implementasaun Direitu Sivil Politika
Maibe iha parte seluk Asosiasaun HAK mos nota porsesu balun lao neneik liu no dala barak lalao. Faktu ida mak sobre akontabilidade autor stadu sira nebe komete kazu kontra lei. Sanksaun disiplinar ka porsesu krimi ba sira nebe komete krimi ladun hatudu prosesu nebe lao lalais. Informasaun husi departementu justisa PNTL husi dia 1 Janeiru to 30 Novembru tinan 2010 hatudu, numeru kazu husi membru PNTL nebe trata iha departementu justisa PNTL hamutuk 365 kazu. Husi kazu sira ne, kazu 108 deit mak foin hetan sanksaun administrativu no kazu 1 hetan demisaun, no kazu 256 sei iha hela prosesu investigasaun departementu justisa PNTL.
Husi numeru kazu 365 ne, kuandu fahe ba kada fulan, fulan ida akontese kazu mais ou menus 33 kazu. Ne mos siknifika loron 1 akontese kazu 1. Numeru ne hatudu kazu membru PNTL as tebes durante tinan 2010. Alein de kazu 365 iha tinan 2010, departementu justisa PNTL mos regista hela kazu hanesan nebe pendente hela husi tinan 2007 to tinan 2009. Siknifika kazu sira seidauk prosesa iha tinan 2010. Faktu sira ne hatudu duni kazu membru PNTL barak no prosesu ba kazu sira lao neneik tebes no barak mak la lao.
Kazu interesante ida husi kazu nebe seidauk lao ka lao nenik mak kazu tiru mate mane klosan ida iha Delta Nova iha fulan dezembru tinan 2009. To fulan Dezembru 2010, publiku seidauk hatene se mak sai supeitu ba kazu refere tamba prosesa ba kazu refere lao kleur liu iha ministeiru publiku. Tuir informasun balun nebe publika iha media iha fulan Agostu 2010, prosesu kazu ne lao kleur tamba ministeriu publiku seidauk hetan evindensia naton hodi bele lori kazu ne ba trinunal. Evindensia menus tamba UNPOL nebe asisti PNTL no PNTL rasik seidauk hetan evidensia forte sobre supeitu ba kazu ne. Maske rezultadu izame balistiku fo sai tiha ona.
Tamba prosesu ba kazu sira ne la lao ka ladun lao lalais, nia impaktu mak kazu ne’ebe hanesan kontinua akontese nafatin. Kazu atuasaun uza forsa la proporsional husi UNPOL no PNTL unidade task force ba joven balun iha Manleuana Dili iha loron 27 Novembru 2010 bele hare nudar izemplu diak nebe hatudu polisia nia atuasaun seidauk muda. Laiha akontabilidade ba kazu sira antes, se loke dalan ba mosu kazu hanesan iha futuru no ikus bele hamenus fali komunidade nia konfiansa ba PNTL rasik. Faktus akontesimentu menus konfiansa ne bele hare mos ba relaidade kazu barak mak komunidade keisa fali ba parlementu nasioanl duke ba UNPOL ka PNTL.
Durante tinan 2009 to 2010 Asosiasun HAK mos nota katak feto barak mak seidauk hetan aksesu ba justisa formal. Asosiasaun HAK nia monitorizasaun ba prosesamentu kazu feto iha nivel polisia, ministeriu publiku, no tribunal durante tinan 2009 no tinan 2010 hatudu feto vitima husi kazu violensia domestika no kazu violensia kontra feto ladun hetan prosesamentu diak ba sira nia kazu iha polisia, ministeriu publiku to iha tribunal. Kazu barak registu no hetan duni investigasaun husi polisia no balun tama duni to ministeriu publiku, maibe instituisaun rua ne dala barak haruka fila fali vitima sira ba rezolve deit ho suspeitu iha familia laran ka rezolve deit tuir adat nian iha komunidade. Iha duni progresu no modansa diak balun iha tinan 2010, maibe modansa sira ne seidauk siknifikante tamba sei akontese nafatin kazu hanesan ho numeru nebe laos kik durante tinan 2010.
Dezafiu ba direitu sivil politika seluk mak intervensaun politika husi ukun nain sira ba lalaok sistema no porsesu judisiariu. Ne akontese ka kazu atentadu 11 Febreiru 2008. Durante prosesu lao iha tribunal, Presidente da republika hasai tiha ona statementu atu pesoalmente presidente sei fo indultu ba ba arguidu sira. Statementu ne influensia ba infrakeza lalaok prosesu kazu ne iha tribunal no infrakeza prosesu hametin lei no la respeitu prinsipiu separasaun poder antre organu soberano sira. Kazu izemplu seluk mak kazu desizaun politika liberta Maternus Bere (arguidu ida ba kazu krimi grave tinan 1999 iha Covalima nebe halao hela porsesu investigasaun). Kazu ne indika akontese intervensaun politika ba sistema no lalaok instituisaun judisiariu tamba ukun nain sira (presidente republika no Primeiru Ministru) deside hasai ka husik livre Maternus Bere husi prosesu judisiariu nebe halao hela ba nia.
Dezafiu direitu sivil politika seluk nebe importante atu fo mos atensaun mak justisa ba kazu krimi grave no kazu krimi kontra umanidade iha tempu akupasaun ilegal Indonesia tinan 1975 to 1999. Asuntu justisa ba kazu sira ne siknifka akontabilidade legal husi autor sira no justisa ba vitima sira. To fulan Dezembru tinan 2010, Asosiasaun HAK nia observasaun hatudu seidauk iha modansa siknifikadu ruma ba akontabilidade legal autor sira husi kazu sira ne. Depois de tribunal Ad Hoc HAM Jakarta la konsege hetan autor ida mos ba kazu refere, no depois de komisaun verdade no amizade entre Timor Leste no Indonesia publika relatoriu iha tinan 2005, ONU seiduak halo buat seluk atu dudu akontabilidade legal husi autor sira ne.
Realidade ne hatudu ONU komete hela ba aktu violasaun direitus umanus seluk tamba la halao esforsu atu hakonu vitima sira nia direitu ba justisa legal tuir lei internasional sira haruka, no liliu tan ne hatudu ONU la konsisten hakotu korente impunidade turi rezolusaun ONU 1772. Nune mos kazu violasaun direitus umanus seluk komete dadauk husi governu Indonesia no governu nasaun seluk nebe suporta Indonesia nia asaun ilegal okupa rai ne iha tinan 1975 to tinan 199 hanesan Australia no stadus unidus Amerika, tamba governu Indonesia no governu rua refere to fulan Dezembru 2010 seidauk ka la hatudu sira nia responsabilidade legal atu suporta programa reparasaun ba vitima sira iha Timor Leste no suporta akontabilidade legal husi autor sira.
2. Dezafiu ba Implementasaun Direitu Ekonomia, Sosial, no Kultura
Ligadu ba direitu ekonomia, sosial no kultura, HAK nia aktividade monitoriza implementasaun programa hasae produsaun aihan rai laran husi ministeriu agrikultura no peskas, programa povu kuda governu sosa no programa importasaun fos husi ministeriu comersio, turismu no industria, programa dezenvolvimentu ekonomia husi ministeiru ekonomia no dezenvolvimentu, no programa edukuasaun husi ministeriu edukasaun, hatudu faktu katak governu seidauk aproveita diak governu nia rekursus tomak hodi efektivamente hakonu sidadaun sira nia direitu ekonomia, sosial no kultura tuir konvensaun direitu ekonomia, sosial no kultura.
Programa hasae produsaun aihan husi ministeriu agrikultura no peskas la konsege halo ministeriu agrikultura no peskas halao politika no utiliza rekursu ho diak ba hakonu agrikultor no peskador sira nia direitu ba moris diak. Ne akontese konseitu dezenvolvimentu agrikultura rasik falha tamba orienta liu ba hasae produsaun aihan rai laran duke fokus mos ba hasae agrikultor sira nia moris diak. Tamba orienta liu ba hasae produsaun aihan rai laran entaun ministeriu agrikultura no peskas nia programa durante ne, inklui tinan 2010, domina ho adopta sistema agrikultura konvensional nebe la sukat ba sustentabilidade dezenvolviemntu agrikultura iha Timor Leste.
Relatoriu ministeriu agrikultura no peskas fo sai iha tinan 2010 katak iha duni aumentu produsaun aihan rai laran depois de agrikultor sira hetan imput trator, fini hibrida, adubus kimiku, pestisida, herbisida no fungisida kimiku. Maibe Asosiasaun HAK nia observasaun ba agrikultor sira nia moris iha distritu oin-oin hatudu, seidauk iha modansa ruma ba agrikultor sira nia moris diak. Katak agrikultor sira nia moris sei nafatin kiak to iha tinan 2010 ne. HAK nia observasaun mos hatudu maske relatoriu hatudu produsaun aihan rai laran hahu aumenta, maibe numeru importasaun fos husi rai liur (fos MTCI) kontinua aumenta ho numera nebe laiha modansa.
Iha parte politika MTCI nian, programa povu kuda governu sosa mos la hatudu konseitu nebe klaru no sustentavel hodi hasae komunidade kiak sira nia kapasidade ekonomia, liu husi rezolve provlema merkadoria no distribuisaun produsaun lokal. Programa ne sosa duni produto lokal balun maibe produtu sira nebe espeksifiku deit. Iha realidade, komunidade nia produto oin-oin no barak mak programa ne la sosa. Alein de ne, programa ne mos flah iha nivele distruisaun tamba akontese kazu barak nebe hatudu depois de sosa tiha produto lokal sira ne, akontese kazu balu nebe aihan sira sai at deit iha armagem laran. Iha fulan Novembru 2010, akontese aihan sira nebe MTCI sosa no rai iha armajen ida iha Bebora, Dili at hotu tamba laiha manutensaun diak ba aihan sira ne. Nune mos batar nebe rai iha armagem ida iha Maubisse sai fohuk hotu tamba razaun hanesan.
Kazu sira nune dala ida tan indika osan barak mak ministeiru ne halo lakon saugate deit. No ne mos indika governu liu husi MTCI la utiliza diak rekursu nebe iha ba hakonou povu nia direitu eknomia, sosial no kultura. Husi parte programa ministeriu edukasaun nian, Asosiasaun HAK nota to tinan 2010 sei akontetese nafatin polemika ba politika edukasaun iha Timor Leste. Polemika sira ne foka ba politika utiliza lian portuges iha prosesu edukasaun formal, polemika sobre fasilidade skola nebe sei menus, polemika sobre programa merenda skolar, polemika sobre kurikulum, polemika sobre kualidade profesores, polemika sobre akesu edukasaun formal ba ema hotu no seluk-seluk tan. Polemika sira ne hotu indika politika no program edukasaun seidauk lao diak duni.
Asosiasaun HAK nia observasaun rasik hatudu kondisaun riil dezenvolvimentu edukasaun akontese duni hanesan sai polemika sira hanesan hakerek iha leten ne. Ne akontese tamba faktor kualidade exekusaun programa husi ministriu edukasaun ladun forte, no liliu tamba ministeriu edukasaun nia konseitu edukasaun rasik ladun forte. Iha kontekstu uza lian protuges, Asosiasaun HAK nota ministeriu edukasaun hamenus tiha ona konseitu baziku edukasaun nebe tuir lolos edukasaun formal nudar fatin ba alununs sira atu aprende buat foun ruma, liliu siensias duke aprende deit lian portuges. Tamba alunus no mos profesores barak mak la hatene portuges, obriga uza lian portuges empata tiha ona alunus sira atu aprende siensias iha skola sira. Alunus sira fila ba uma, inan aman mos la hatene lian portuges no inan aman sira lakonsege ajuda sira nia oan atu aprende siensias.
Iha kontekstu ne akotese hela limitiasaun ba alunsun sira nia direitu atu hetan aksesu luan ba edukasaun tamba lingua nebe uza la fasilita alunus sira bele fasil no lalais hetan informasaun kona ba siensias. Nune mos menus fasilidade nebe sei akontese to tinan 2010 tamba falhansu servisu husi ministeriu edukasaun kontribui mos ba empata alunus sira nia direitu atu hetan aksesu ba edukasaun nebe kualidade diak. Prinsipiu importante ida husi direitu ba edukasaun mak politika no programa edukasaun aksesivel. Prinsipiu aksesivel laos deit siknifika ema hotu bele fasil tama eskola tamba skola loke barak no gratuitu, maibe mos siknifika sistema, instrumentu, no metode nebe uza iha prosesu aprendizajem iha skola sira tenke fasil halo alunus sira aprende lalais buat foun ruma.
III. Sujestaun ka Rekomendasaun
Hare ba realidade no dezafiu sira leten ne, Asosiasaun HAK hakarak hato sujestaun no rekomendasaun hanesan tuir mai ne.
A. Ba Stadu Timor Leste
1. Timor Leste tenke dezenvolve no haforsa implementasaun politika nebe fasilita efektivamente akontabilidade legal ba autor stadu nebe komete hahalok kontra lei , hahalok krimi, hahalok abuza poder, hahalok korupsaun, no hahalok violasaun kontra direitus umanus iha instituisaun governu laran, no iha instituisaun inplementador lei no instituisaun siguransa sira hanesan iha instituisaun PNTL no F-FDTL.
2. Iha tempu hanesan Timor Leste mos tenke hasae liu tan kapasidade in termus kunhesimentu ba lei no direitus umanus no intermus fasilidade servisu nian ba instituisaun PNTL no F-FDTL hodi ajuda instituisaun rua ne bele halao sira nia kna’ar tuir prosedimentu lei nebe vigora. Inkuli kapasidade unidade polisia VPU, polisia investigasaun no polisia komunitariu atu servisu diak liu tan ba promove aksesu vitima feto ba justisa formal.
3. Timor Leste mos tenke aplika lalais politika forte nebe bele hadok Timor Leste husi hahalok intervensaun politika ukun nain sira ba sistema no lalaok judisiariu, no hadok an husi hahahalok nebe haburas bebeik impunidade iha nasaun ne.
Tamba ne nia dalan ida mak husu ba Parlementrtu Nasional atu iha tinan 2011 tenke aprova ona lei nebe regula kriteria no prosesu atu fo indultu ba prizioneirus sira.
4. Timor Leste mos tenke hatudu pratika politika forte liu tan atu kombate korupsaun. Liliu reforsa liu tan asaun kria no hadia sistema internal iha governu laran nebe taka dalan ba mosu korupsaun husi auotridade sira nebe uza poder hodi halo korupsaun iha governu laran. KAK deit lato kuandu laiha esforsu forte husi governu atu prevene kazu korupsaun iha governu laran.
5. Timor Leste mos tenke hadia no reforsa liu tan politika dezenvolvimentu seitor edukasaun nebe orienta liu ba oin sa ema hotu bele hetan aksesu ba edukasaun formal nebe kualidade no bele fasilita ema hotu fasil aprende buat foun iha prosesu aprendizajem iha skola formal tomak.
Se karik lingua portuges sai obstaklu atu fasilita diak alunus ka studante sira fasil aprende lalais buat foun ruma, liliu siensias iha skola sira, diak liu dezenvolve politika seluk nebe karik prosesu aprende lian portuges halao etapa pur etapa deit duke obriga implementa kedas agora maibe taka dalan fali ba alunus ka studante sira atu fasil aprende lalais siensias.
Prinsipiu importante ida iha edukasaun mak oin sa ema hotu iha aksesu ba edukasaun no prosesu edukasaun formal tenke fasilita diak parte hotu bele fasil aprende lalais siensias. Linggua ofisial laos portuges deit maibe mos tetum. Tansa ministeiru edukasaun preokupa liu ba linggua portuges duke uza lai tetum iha skola sira. Se uza tetum bele ajuda alunus ka studante sira fasil aprende siensias, tansa tenke obriga lalais lian portuges.
6. Timor Leste mos tenke iha ka tenke halo lalais politika nebe klaru kona dalan atu hamenus kiak iha nasaun ne liu husi politika dezenvolviemntu agrikultura no peskas nebe sustentavel (katak orienta mos ba hasae agrikultor no peskador nia moris diak, laos deit atu asegura aumentu produsaun aihan ba nesesidade nasional), dezenvolve koperativa ba agrikultor no peskador sira nusa dalan diak liu atu hamenus kiak iha nasaun ne, hadia no haforsa liu tan programa povu kuda governu sosa no managementu diak ba lalaok distriubisaun aihan sira ne, haforsa kordenasaun no ligasaun servisu diak liu tan entre ministeriu sira nebe relasaun ba politika no programa aihan nasional no hamenus kiak iha nasaun ne, no politika diak sobre importasaun no distribuisaun aihan, liliu fos husi liur nebe bele fasilita diak liu tan ema hotu bele fasil aksesu ba aihan sira nebe hetan subsidiu husi stadu nia osan.
7. Timor Leste mos tenke adopta lei rai nebe rekunhese no proteze rai komunal, no loke aksus luan nohanesan ba sidadaun tomak atu iha rai hodi buka moris no hodi halo uma ba hela fatin. Timor Letse mos tenke halo politika muda populasaun hsui stadu nia propriedade nebe la halakon sidadaun sira nia direitu atu iha rai no uma nebe saudavel
8. Timor Leste, liliu parlementu nasional tenke aprova ona lei reparasaun vitima no instituisaun memorial iha tinan 2011 tuir desizaun nebe parlementu rasik deside iha tinan 2010
9. Nune mos Timor Leste tenke iha ka tenke halo lalais politika klaru kona ba responsabilidade governu Indonesia no governu seluk nebe apoia okupasaun ilegal indonesia ba timor leste tinan 1975 to 1999 atu mos responsabiliza no suporta legalmente programa reparasaun vitima no instituisaun memorial refere.
10. Timor Leste tenke ratifika ona konvensaun internasional ema lakon obrigatoriu iha tinan 2011 hodi bele fasilita prosesu buka hetan fali ema sira nebe lakon obrigatoriu iha militar no auotridade sivil indonesia nia liman durante okupasaun ilegal indonesia ba rai ne tinan1975-1999.
B. Ba ONU, governu Indonesia, governu Australia, no governu stadus Unidus America
1. ONU nudar organizasaun mundial sumbriha ba nasaun tomak nebe sai membru ONU tenke hatudu responsabilidade ba rezolve kazu krimi grave no kazu krimi kontra umanidade iha Timor Leste tinan 1975 to 1999 tamba kazu refere nudar kazu kontra lei internasional.
Tribunal iha Timor Leste no Indonesia laiha kbi’it no la konsege lori autor prinsipal ida mos responsabiliza sira nia hahalok. Tan ne husu ba ONU atu komesa diskuti ona dalan internasionalmente atu dudu no prosesa akontabilidade legal ba autor sira ne.
2. ONU mos tenke hatudu responsabilidade seluk ba asuntu refere liu husi dalan dezenvolve lalais politika fundus solidariedade tuir rekomendasaun nebe hasai husi relatori CAVR ka relatoriu CHEGA
3. Governu Indonesia tenke hatudu vontade politika diak atu nafatin dudu prosesu akontabilidade klegal ba autor prinsipal sira ba kazu krimi grave no kazu kontar umanidade iha Timor Leste, hatudu politika klaru no legal ba suporta programa repasaun vitima no institusiaun memorial iha Timor Leste. Governu Indonesia legalmente tenke responsabiliza ba asuntu ne tamba autor ba kazu sira nebe hamisu vitima barak iha timor leste akontese husi Indonesia nia militar no autoridade sivil sira iha tempu okupasaun ilegal indonesia ba rai ne tinan 18=975 to 1999
4. Governu Australia no governu Stadus Unidus Amerika nebe durante okupasaun ilegal Indonesia apoia no suporta legalmente, ekonomikamente, no politikamente Indonesia iha tempu neba, mos tenke suporta legalmente programa reparasaun ba vitima sira iha timor leste no suporta prosesu akontabilidade legal ba autor sira husi kazu krimi graves no kazu krimi kontra umanidade iha TimorLeste
5. Ikus liu, governu Indonesia mos tenke halo no impleenta politika klaru nebe suporta diak prosesu rezolve kazu ema lakon obrigatoriu durante tempu akupasaun ilegal indonesia iha rai ne tinan 1975 to 1999.
Mak ne deit konfrensia pers ne hato, husu ba stado Timor Leste, governu Indonesia, governu Australia, no ONU atu konsedera rekomendasaun nebe hato iha leten hodi bele ajuda Timor Leste no mos komunidade Internasional hametin liu tan protesaun ba direitus umansus, demokrasia, no implementasuan lei iha Timor Leste, Indonesia no mos iha nasaun seluk iha mundu nebe sei ahsoru problema hanesan ho Timor Leste.
Dili, 10 Dezembru 2010
