INDICE ARTIKULADU NIAN
PARTE I
PRINSIPIU FUNDAMENTAL
Artigu
1 Repúblika
2 Soberania no konstitusionalidade
3 Rainain
4 Rai
5 Desentralizasaun
6 Objetivu Estadu nian
7 Sufrajiu universal no multipartidarismu
8 Relasaun internasional
9 Simu direitu internasional
10 Solidariedade
11 Valor rezistensia nian
12 Estadu nia relasaun ho relijiaun sira
13 Lian ofisial no nasional
14 Símbolu nasional sira
15 Bandeira Nasional
PARTE II
DIREITU, DEVER, LIBERDADE NO GARANTIA FUNDAMENTAL SIRA
TITULU I
PRINSIPIU JERAL SIRA
16 Universalidade no igualdade
17 Igualdade mane no feto sira nian
18 Protesaun bá labarik oan sira
19 Klosan sira
20 Katuas no ferik sira
21 Rainain ne’ebe iha defisiénsia
22 Timor oan sira iha tasi-balu
23 Interpretasaun kona-ba direitu fundamental sira
24 Lei restritivu sira
25 Estadu esepsaun nian
26 Asesu bá tribunal sira
27 Provedor Direitus Humanus no Justisa ninian
28 Direitu rezisténsia nian no defende an rasik
TITULU II
DIREITU, LIBERDADE NO GARANTIA IDA-IDAK NIAN
29 Direitu bá moris
30 Direitu bá liberdade, seguransa no integridade ema idaidak nian
31 Hala’o lei krimi nian
32 Limite bá kastigu no medida sira seguransa nian
33 Habeas Corpus
34 Garantia bá prosesu krimi nian
35 Estradisaun no espulsaun
36 Direitu bá honra no privasidade
37 Labele viola uma no korespondensia
38 Protesaun bá informasaun ema idaidak ninian
39 Familia, kazamentu no maternidade
40 Liberdade ko’alia no informasaun ninian
41 Liberdade imprensa no komunikasaun sosial ninian
42 Liberdade reuniaun no manifestasaun nian
43 Liberdade asosiasaun nian
44 Liberdade sirkulasaun nian
45 Liberdade konsiénsia, relijiaun no kultu ninian
46 Direitu bá partisipasaun iha politika
47 Direitu sufrajiu nian
48 Direitu petisaun nian
49 Defeza soberania nian
TITULU III
DIREITU NO DEVER EKONOMIKU, SOSIAL NO KULTURA NINIAN
50 Direitu bá servisu
51 Direitu bá greve no bandu lock-out
52 Liberdade sindikal
53 Direitu konsumidor sira nian
54 Direitu bá Propriedade privadu
55 Obrigasaun kontribuinte nian
56 Seguransa no tulun sosial nian
57 Saúde
58 Uma hela fatin
59 Edukasaun no kultura
60 Propriedade intelektual
61 Meiu-ambiente
PARTE III
ORGANIZASAUN PODER POLITIKU NIAN
TITULU I
PRINSIPIU JERAL SIRA
62 Titularidade no exercício poder nian
63 Partisipasaun polítiku rainain nian
64 Prinsípiu renovasaun nian
65 Eleisaun sira
66 Referendu
67 Orgaun sira soberania ninian
68 Inkompatibilidade
69 Prinsipiu kona-ba haketak poder sira
70 Partidu politiku sira no direitu opozisaun nian
71 Organizasaun administrativa
72 Poder lokal
73 Publisidade aktu sira nian
TITULU II
PRESIDENTE REPUBLIKA NIAN
KAPITULU I
ESTATUTU, ELEISAUN NO NOMEASAUN
74 Definisaun
75 Elejibilidade
76 Eleisaun
77 Simu knaar no juramentu
78 Inkompatibilidade
79 Responsabilidade krimi no obrigasaun konstituisaun ninian
80 Auzénsia
81 Renúnsia bá mandatu
82 Mate, sai ka inkapasidade permanente
83 Kazu esepsional sira
84 Substituisaun no interinidade
KAPITILU II
KOMPETENSIA
85 Kompeténsia rasik
86 Kompeténsia kona-ba orgaun sira seluk
87 Kompeténsia kona-ba relasaun internasional
88 Promulgasaun no vetu
89 Asaun Prezidente interinu nian
KAPITULU III
KONSELLU ESTADU NIAN
90 Konsellu Estadu nian
91 Kompeténsia, organizasaun no funsionamentu Konsellu Estadu ninian
TITULU III
PARLAMENTU NASIONAL
KAPITULU I
ESTATUTU NO ELEISAUN
92 Definisaun
93 Eleisaun no kompozisaun
94 Imunidade
KAPITULU II
KOMPETENSIA
95 Kompeténsia Parlamentu Nasional nian
96 Autorizasaun lejislativu
97 Inisiativa lei nian
98 Parlamentu haree ba aktu sira lejislasaun ninian
KAPITULU III
ORGANIZASAUN NO FUNSIONAMENTU
99 Lejislatura
100 Disolusaun
101 Partisipasaun membru sira Governu ninian
KAPITULU IV
KOMISAUN PERMANENTE
102 Komisaun Permanente
TITULU IV
GOVERNU
KAPITULU I
DEFINISAUN NO ESTRUTURA
103 Definisaun
104 Kompozisaun
105 Konsellu Ministru sira nian
KAPITULU II
FORMASAUN NO RESPONSABILIDADE
106 Nomeasaun
107 Responsabilidade Governu nian
108 Programa Governu nian
109 Haree bá programa Governu nian
110 Husu votu konfiansa
111 Mosaun sensura nian
112 Demisaun Governu nian
113 Responsabilisade kona-ba krimi Membru sira Governu ninian
114 Imunidade Membru sira Governu ninian
KAPITULU III
KOMPETENSIA
115 Kompeténsia Governu nian
116 Kompeténsia Konsellu Ministru sira nian
117 Kompeténsia membru sira Governu nian
TITULU V
TRIBUNAL SIRA
KAPITULU I
TRIBUNAL SIRA NO MAJISTRATURA JUDISIAL
118 Knaar jurisdisional
119 Independénsia
120 Haree bá hahalok ne’ebe la tuir Lei-Inan
121 Juiz sira
122 Eskluzividade
123 Kategoria tribunal sira ninian
124 Supremu Tribunal Justisa nian
125 Hala’o knaar no kompozisaun
126 Kompeténsia konstituisaun no eleisaun nian
127 Elegibilidade
128 Konsellu Superior Majistratura Judisial nian
129 Tribunal Superior Administrativu, Fiskal no Konta nian
130 Tribunal militar sira
131 Audiénsia tribunal sira nian
KAPITULU II
MINISTERIU PUBLIKU
132 Hala’o knaar no estatutu
133 Prokuradoria-Jeral Repúblika nian
134 Konsellu Superior Ministériu Públiku nian
KAPITULU III
ADVOGAKASIA
135 Advogadu sira
136 Garantia kona-ba hala’o advokasia
TITULU VI
ADMINISTRASAUN PUBLIKA
137 Prinsípiu jeral sira Administrasaun Públiku ninian
PARTE IV
ORGANIZASAUN EKONOMIKU NO FINANSA NIAN
TITULU I
PRINSIPIU JERAL SIRA
138 Organizasaun ekonómiku
139 Rekursu natural sira
140 Investimentu
141 Rai
TITULU II
SISTEMA FINANSA NO FISKAL NIAN
142 Sistema finansa nian
143 Banku Sentral
144 Sistema fiskal
145 Orsamentu Jeral Estadu nian
PARTE V
DEFEZA NO SEGURANSA NASAUN NIAN
146 Forsa Armada sira
147 Polisia no forsa seguransa sira
148 Konsellu Superior Defeza no Seguransa nian
PARTE VI
GARANTIA NO REVIZAUN LEI-INAN NIAN
TITULU I
GARANTIA LEI-INAN NIAN
149 Fiskalizasaun preventivu dalan Lei-Inan ninian
150 Fiskalizasaun abstraktu dalan Lei-Inan ninian
151 La tuir dalan lei-inan ninian hosi omisaun
152 Fiskalizasaun konkretu dalan Lei-Inan ninian
153 Lia-Hakotun Tribunal Supremu Justisa nian
TITULU II
REVIZAUN LEI-INAN NIAN
154 Inisiativa no tempu revizaun nian
155 Aprovasaun no promulgasaun
156 Limite material sira revizaun ninian
157 Limite sirkunstansial revizaun nian
PARTE VII
DISPOZISAUN FINAL NO TRANZITORIA SIRA
158 Tratadu, akordu no aliansa sira
159 Lian serbisu nian
160 Krimi bo'ot sira
161 Hasai riku-soin la tuir lei
162 Rekonsiliasaun
163 Organizasaun Judisial Tranzitoriu
164 Kompeténsia tranzitóriu Supremu Tribunal Justisa nian
165 Direitu ida uluk
166 Transformasaun Asembleia Konstituiente nian
167 Eleisaun prezidensial 2002 nian
168 Lei-Inan tama iha vigor
KONSTITUISAUN REPUBLIKA DEMOKRATIKA
TIMOR LOROSA’E NIAN
PARTE I
PRINSIPIU FUNDAMENTAL SIRA
Artigu 1
(Repúblika)
1. Repúblika Demokrátika Timor-Leste katak Estadu ida ne’ebe demokrátiku, soberanu, ukun-an no unitáriu, harii hosi povu nia vontade no iha respeitu bá dignidade ema moris idaidak ninian.
2. Loron 28 fulan Novembru tinan 1975 maka loron Proklamasaun Independénsia Republika Demokratika Timor-Leste nian.
Artigu 2
(Soberania no dalan ne’ebe tuir lei-inan)
1. Soberania hatur metin iha povu , ne’ebe hala’o tuir Lei-Inan haruka.
2 Estadu submete bá Lei-Inan no lei-oan sira.
3 Lei-oan sira no hahalok seluk tan hosi Estadu no kbiit autoridade lokal sira nian iha folin wainhira sira hala’o tuir duni Lei-Inan haruka.
4 Estadu rekonhese norma kostumeiru rai Timor nian ne’ebe nailas-an, tuir Lei-Inan no mos lejizlasaun seluk tan ne’ebe ko’alia liu ba direitu kostumeiru.
Artigu 3
(Rainain)
1. Iha Repúblika Demokrátika Timor-Leste nia laran iha rainain nanis no rainain husun.
2. Rainain nanis Timor-Leste ninian maka ema ne’ebe moris nanis iha rai nasional laran:
a) oan sira ne’ebe hetan hosi aman no inan ne’ebe moris iha Timor-Leste;
b) oan sira ne’ebe hetan hosi aman eh inan ne’ebe moris iha Timor-Leste;
c) oan sira ne’ebe hetan hosi aman no inan laiha, nasionalidade eh raimoris fatin la hatene;
d) oan sira ne’ebe hetan hosi aman eh inan hosi rai seluk, ne’ebe liu ona tinan sanulu resin hitu, sira hakotu lia rasik hakarak sai timoroan;
3. Rainain nanis Timor-Leste nian, biar moris iha rai liur:
a) oan sira ne’ebe hetan hosi aman no inan timoroan ne’ebe tuur fatin iha rai liur;
b) oan sira ne’ebe hetan hosi aman eh inan timoroan ne’ebe serbi ba Estadu iha rai liur.
4. Lei-oan mak regula kona-ba akizisaun, lakon no rekizisaun ba rainain hanesan mos kona-ba sira nia rejistu no prova.
Artigu 4
(Rai nasional)
1. Rai RDTL nian halo parte rai-foho nia luan no naruk no klehan zona tasi nian no kalohan-laran tuka-ba rai-ketan nasional sira, ne’ebe tuir “liak-tuan” tama hotu iha kles lorosaen tasi-le’un Timor nian, rai-le’un Oe-cussi Ambeno, tasi-le’un Atauru no tasi-le’un Jaco.
2. Lei-oan sei hametin no hatur kona-ba estensaun no limite we iha rai-laran, zona ekonomika esklusiva (haketak tasi mutin no metan) no Timor-Leste nia direitu iha zona kontigua no plataforma kontinental.
3. Estadu sei la aliena Timoroan nia rai rohan ida eh nia direitu soberania nian kona-ba ne’e nia hala’o, sem halo-aat (prejuizo) ba ratifikasaun kona-ba rai-ketan.
Artigu 5
(Desentralizasaun)
1. Estadu respeita iha nia organizasaun rai-laran nian, kona-ba prinsipiu atu hakfahek kbiit Administrasaun Publika nian.
2. Lei-oan maka hatur no hametin karakterístika eskalaun oin-oin rai rai-laran, no mós kompeténsia administrativu orgaun sira ne’e ninian.
3. Oe-cussi Ambeno no Atauro sira hetan tratamentu administrativu no ekonomiku espesial.
Artigu 6
(Objectivu sira Estadu nian)
Estadu nia objetivu fundamental sira maka ne’e:
a) Defende no garante nasaun nia soberania;
b) Garante no promove rainain sira nia direitu no liberdade fundamental, no respeitu bá Estadu nia prinsípiu kona-ba direitu demokrátiku;
c) Defende no garante demokrasia polítika no partisipasaun populasaun nian kona-ba rezolusaun problema nasional sira;
d) Garante dezenvolvimentu ba ekonómia, ba progressu siénsia no téknika;
e) Harii sosiedade ida ne’ebe hatuur iha justisa sosial, hodi hakiak rainain sira nia moris di’ak ho isin no klamar nian;
f) Proteje didi’ak meiu-ambiente no boli nafatin riku-sóin rai nian;
g) Afirma no valoriza povu Timor nia personalidade no nia patrimóniu kultural.
h) Harii no dezenvolve relasaun di’ak no harosan (koperasaun) ho povu no Estadu hotu-hotu;
i) Promove dezenvolvimentu furak liu no integra ba sektor no rejiaun sira, no hakfoek loloos produtu nasional;
j) Promove nafatin igualdade ba oportunidade iha ema feto no mane.
Artigu 7
(Sufrájiu universal no multipartidarismu)
1. Povu hala’o nia kbiit polítiku liu hosi sufrájiu universal livre, direktu, sekretu no periódiku, no hanesan ba hotu-hotu no forma seluk tan ne’ebe hakerek ona iha Lei-Inan.
2. Estadu fó valor bá partidu polítiku sira nian kontribuisaun tuir vontade povu nia espresaun ne’ebe organizada no ba rainain nia partisipasaun demokratiku iha hahalok ukun nian iha nasaun laran.
Artigu 8
(Relasaun internasional)
1. Repúblika Demokrátika Timor Leste hala’o relasaun internasional hosi prinsípiu independénsia nasional, kona-ba ema hotu nia direitu, povu nia autodeterminasaun ba independénsia, kona-ba protesaun emar hotu-hotu nian, direitu ba respeitu malu ba idaidak nia soberania, integridade rai-laran nian no igualdade entre Estadu sira no labele halo interferensia ba Estadu ida-idak nia asuntu rai laran.
2. Repúblika Demokrátika Timor Leste halo relasaun di’ak no harosan ho povu hotu-hotu, atu hakotu lia di’ak kona-ba konflitus, dezarmamentu jeral, simultáneu no kontroladu, harii sistema seguransa kolektivu no hakiak orden ekonómiku internasional foun ida atu bele kaer metin dame no justisa iha povu hotu-hotu nia relasaun.
3. Repúblika Demokrátika Timor Leste hala’o relasaun privilejiadu ida ho nasaun hirak ne’ebe ko’alia lian ofisial portugés.
4. Repúblika Demokrátika Timor Leste hala’o nafatin nia relasaun espesial di’ak no ho harosan ho nasaun vizinhu sira no ho hirak ne’ebe iha rejiaun laran.
Artigu 9
(Simu Direitu Internasional)
1. Orden juridika Timor nian adopta prinsipiu sira direitu internasional jeral nian eh hotu-hotu nian.
2. Norma sira ne’ebe mai iha konvensaun, tratadu no akordu internasional sira nia laran vigora iha ordem juridika interna hosi aprovasaun, ratifikasaun eh adezaun hosi orgaun kompetente sira ne’e rasik, wainhira publika tiha ona iha jornal ofisial.
3. Valor laek norma ba lei sira hotu-hotu ne’ebe la tuir konvensaun nia dispozisaun no akordu internasional sira ne’ebe simu hosi ordem juridika interna Timor nian.
Artigu 10
(Solidariedade)
1. Repúblika Demokrátika Timor Leste mos solidáriu ho povu hotu-hotu ne’ebe luta bá libertasaun nasional.
2. Repúblika Demokrátika Timor Leste fo azíliu polítiku, tuir lei haruka, bá ema rai seluk sira ne’ebe persiguidu tamba sira nia luta ba libertasaun nasional no sosial, defeza bá direitus ema ninian, demokrasia no dame.
Artigu 11
(Valorizasaun rezisténsia nian)
1. Repúblika Demokrátika Timor Leste rekonese no fó valor bá povu Maubere nia rezistensia secular (tinan atus ba atus) hasoru dominasaun hosi rai liur no mos ba sira hotu ne’ebe fo kontribuisaun hodi luta ba independensia nasional.
2. Estadu rekonese no valoriza bá partisipasaun Igreja nian partisipasaun iha prosesu ba libertasaun nasional Timor Leste nian.
3. Estadu asegura protesaun espesial ba mutiladu funu nian, orfaun “oan bide” no mos sira seluk tan ne’ebe fo-an tomak ba luta ba independensia no soberania nasional, no proteje mos sira hotu ne’ebe partisipa ona iha rezistensia hodi hasoru okupasaun hosi rai seluk, tuir lei haruka.
4. Lei maka defini (hatur loloos) kona-ba mekanismu atu fo homenajen bá heroi (aswain) nasional sira.
Artigu 12
(Estadu no relijiaun sira)
1. Estadu laiha relijiaun ofisial.
2. Estadu respeita fiar oin-oin ne’ebe sira nia organizasaun iha liberdade atu hala’o atividade relijiosa sira, ne’ebe buka halo tuir nafatin Lei-Inan no lei- oan sira.
3. Estadu hala’o knaar hamutuk ho instituisaun fiar relijiaun oin-oin, ne’ebe hakarak serbi ba povo Timor-Leste nia di’ak.
4. Instituisaun Relijiaun ida-idak iha direitu atu hetan soin hodi hala'o nia objetivu
Artigu 13
(Lian ofisial no nasional)
1. RDTL nia lian ofisial maka Tetum no Portugues.
2. Estadu valoriza no dezenvolve Tetum no lian nasional sira seluk.
Artigu 14
(Simbolu nasional)
1. Simbolu RDTL ninian maka bandeira, emblema no hinu nasional.
2. Lei-oan maka aprova emblema no hinu nasional.
Artigu 15
(Bandeira nasional)
1. Bandeira nasional nia forma maka retangular no triangulu izoceles rua hosi hun hanesan, ne'ebe tetek malu, ida metan nia as ho tersu ida (sepertiga) hosi komprimentu ne’ebe hateten sae iha kor kinur nia leten no nia as hanesan ho komprimentu sorin balu bandeira nian. Iha triangulu kor metan nia klaran iha fitun mutin no sanak lima nudar naroman ne’ebe hatudu dalan. Fitun mutin nia sanak ida fila ba bandeira nia parte leten hosi liman lo'os. Parte balun hosi bandeira nian, maka kor mean.
2. Kor sira ne’e reprezenta:
• Kinur dourado, riku soin nasaun nian
• metan, nakukun ne’ebe presiza halakon
• mean purpura, funu ba libertasaun nasional
• mutin, dame.
PARTE II
DIREITU, DEVER, LIBERDADE NO GARANTIA FUNDAMENTAL SIRA
TITULU I
PRINSIPIU JERAL SIRA
Artigu 16
(Universalidade no igualdade)
1. Rainain hotu-hotu hanesan iha lei nia oin, no mos iha direitu no dever hanesan.
2. Labele halo diskriminasaun bá ema ida tamba nia kulit, nia rasa, nia estadu sivil, nia sexu, orijen etniku, pozisaun sosial eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mental.
Artigu 17
(Igualdade ba feto no mane)
1. Feto no mane iha direitu no obrigasaun hanesan iha vida familia, kultura, sosial, ekonomika no politika.
Artigu 18
(Protesaun ba labarik)
1. Labarik sira iha direitu ba protesaun espesial husi familia, komunidade, no mos estadu liu-liu hasoru hahalok hotu hanesan la tau-matan, diskriminasaun, violensia, opresaun, abuzu sexual no explorasaun.
2. Labarik sira hetan direitu hotu-hotu ne’ebe mundu rekonhese, hanesan direitu sira ne’ebe hakerek ona iha konvensaun internasional, ne’ebe estadu aprova no simu ona ka ratifika beibeik.
3. Labarik hotu-hotu ne’ebe moris iha kazamentu nia laran ka lae, iha direitu hanesan kona-ba protesaun sosial.
Artigu 19
(Juventude)
1. Estadu foti no fo brani ba klosan no fetoran sira, atu sira bele hamutuk hodi harii, hametin, hatau no foti nasaun ne’e.
2. Estadu sei halo buat hotu-hotu ne’ebe nia bele, atu tulun edukasaun, saude, formasaun profisional ba klosan sira.
Artigu 20
(Ferik no Katuas sira)
1. Sidadaun sira ne’ebe ferik no katuas (terceira idade), iha direitu ba protesaun especial hosi Estadu.
2. Fo oportunidade mos ba politika terceira idade nian, atu sira bele hola parte iha vida sosial, ekonomiku, kultura hodi nune’e bele moris ho dignidade iha komunidade nia laran.
Artigu 21
(Rainain ne’ebe iha defisiensia)
1. Rainain ne’ebe iha defisiensia fizika eh mental iha direitu no mos dever hanesan rainain sira seluk, maibe sira sei la hala’o knaar hirak ne'ebe sira labelehala’o tamba de’it sira nia defisiensia.
2. Estadu, wainhira bele, promove protesaun ba rainain sira ne’ebe iha defisiensia, tuir lei haruka.
Artigu 22
(Timor oan sira ne’ebe hela iha tasi-balu)
Rainain sira ne’ebe hela eh tuur iha rai tasi-balu iha protesaun hosi Estadu kona-ba sira nia direitu no sujeitu ba dever ne’ebe la’os inkompativel tamba sira la helaiha rai laran.
Artigu 23
(Interpretasaun direitu fundamental sira)
Direitu fundamental sira ne’ebe konsagra iha Lei-Inan la hasai direitu sira seluk lei nian no tenki interpreta sira tuir Deklarasaun Universal Direitus Humanus nian.
Artigu 24
(Lei restritivu )
1. Limitasaun ba direitu, liberdade no garantia sei halo de’it tuir lei-oan atu bele fo protesaun ba direitu no interese konstitusional ne’ebe hakerek iha Lei-Inan.
2. Lei restritivu sira kona-ba direitu, liberdade no garantia iha sei iha duni karakter jeral no abstratu, labele habadak extensaun no nia asuntu prinsipal iha Lei-inan nia laran no labele iha efeitu ba kotuk.
Artigu 25
(Estadu esepsaun nian)
1. Lei de’it maka bele hapara direitu, liberdade no garantia fundamental wainhira iha estadu de sitio eh estadu de emerjensia, tuir Lei-Inan haruka.
2. Bele de’it deklara estadu de sitiu eh emerjensia wainhira iha kazu agresaun eh ameasa hosi forsa rai seluk ne’ebe atu tama dadauk ona, wainhira perturbasaun boot ka ameasa atu sobu ordem konstitusional demokratiku eh kalamidade publiku/dezastre natural
3. Wainhira fo sai ona deklarasaun estadu de sitiu eh emerjensia nian sei hapara mos direitu, liberdade no garantia sira ne’ebe mai iha espesifikasaun laran.
4. Wainhira presiza tebes duni, labele hanaruk suspensaun liu loron tolunulu nia laran, sem impedimentu atu hafoun hikas suspensaun ho tempu ne’ebe hanesan.
5. Deklarasaun estadu de sitiu labele afeta direitu ba moris, integridade fizika, sidadania, no labele halo retroatividade ba lei penal, direitu ba defeza ne’ebe iha ona prosesu krimi nia laran no liberdade konsiensia no relijiaun nian.
6. Autoridade sira iha obrigasaun atu harii hikas fali normalidadeLei-Inan nian, iha tempu badak nia laran.
Artigu 26
(Asesu ba tribunal sira)
1. Ema hotu-hotu iha direitu atu ba tribunal hodi defende sira nia direitu no interese sira ne’ebe lei fo protesaun ba.
2. Labele nega justisa ba ema ida, tamba de’it nia la iha kbiit osan nian.
Artigu 27
(Provedor Direitus Hmanus no Justisa nian)
1. Provedor Direitus Humanus no Justisa nian, nudar orgaun independente ida ne’ebe iha knaar atu haree no buka hatan rainain sira nia problema hasoru poder publiku, hodi haree loloos hahalok sira ne’e tuir duni lei, no halo prevensaun no hahu prosesu tomak hodi hadian fali injustisa.
2. Rainain sira bele hato’o sira nia kesar ba Provedor Direitus Humanus no Justisa nian kona-ba poder publiku sira nia hahalok eh omisaun, biar laiha kbiit atu hakotu-lia, nia bele hato’o lia-menon ba orgaun kompetente sira.
3. Maioria absoluta hosi Parlamentu Nasional maka hili Provedor Direitus Humanus no Justisa nian atu hala’o knaar iha tinan 4 nia laran.
4. Knaar Provedor Direitus Humanus no Justisa ne’e independente hosi “meios graciosos no contenciosos” ne’ebe hakerek iha Lei-Inan no lei-oan sira.
5.Orgaun sira no ema administrasaun ninian iha dever atu kolabora ho Provedor Direitus Humanus no Justisa nian.
Artigu 28
(Direitu rezistensia no defende an rasik)
1. Rai-nain hotu-hotu iha direitu atu la simu no rezisti ordem ne’ebe ta tuir lei eh ne’ebe ofende nia direitu, liberdade no garantia fundamental sira.
2. Ema hotu-hotu iha garantia kona-ba direitu atu defende nia an rasik, tuir lei haruka.
TITULU II
DIREITU, LIBERDADE NO GARANTIA SIRA
Artigu 29
(Direitu ba vida)
1. 1. Labele viola ema ida nia vida.
2. Estadu rekonhese no garante direitu ba vida.
3. Iha RDTL la iha pena da morte.
Artigu 30
(Direitu ba liberdade, seguransa no integridade ema ida nian)
1. Ema hotu-hotu iha direitu ba liberdade, seguransa no integridade ba nia an rasik.
2. Labele kaer ka dadur ema ida, se karik hahalok ne’e la tuir dalan ne’ebe hakerek tiha ona iha lei ne’ebe hala'o daudaun nia laran, tenki hato’o beibeik detensaun eh dadur ema ne’e nian ba juiz ne’ebe iha kbiit atu haree iha prazu legal nia laran.
3. Ema hotu ne’ebe lakon nia liberdade tenki simu kedas informasaun loloos no momoos kona-ba razaun tan sa nia dadur eh tama iha kadeia no mos nia direitu, no hetan lisensa atu ko’alia rasik ho advogadu eh hosi nia maluk eh ema ida ne’ebe nia konfia.
4. Ema ida labele hetan tratamentu aat, ne’ebe la’os humanu eh degradante.
Artigu 31
(Aplikasaun lei krimi nian)
1. Labele lori ema ida ba julgamentu wainhira lei-oan la haruka.
2. Laiha ema ida bele julgadu no kondenadu hodi hahalok ruma ne’ebe seidauk kualifika loloos iha lei nudar krimi iha momentu ne’ebe nia halo, labele mos hetan terus hodi medida seguransa nian hosi liur-ba ne’ebe ladauk hateten iha lei liu-ba.
3. Labele fo-uluk pena eh medida seguransa nian ba ema ida iha momentu nia halo krimi, wainhira hahalok ne’e ladauk hakerek iha lei..
4. La iha ema ida bele julgadu no kondenadu liu dala-ida kona-ba krimi hanesan.
5. Lei penal labele aplika-hikar ba maka-salah ida, mesak-deit ba hahalok ne’ebe iha lei-foun benefisia ema salah ne’e.
6. Ba ema ne’ebe de’it maka kondenadu maibe laloos, nia iha direitu ba justa indeminizasaun, tuir lei haruka.
Artigu 32
(Limitasaun ba pena no medida seguransa nian)
1. Iha Repúblika Demokrátika Timor-Leste laiha prizaun perpétua, laiha mos pena no medida seguransa nian ho durasaun rohan-laek eh ladauk defini loloos.
2. Iha kazu rumah ne’ebe bele lori susar ruma hanesan anomalia psiquika, bele hanaruk medida seguransa tuir desizaun judisial.
3. Responsabilidade penal labele tula-fali ba ema seluk.
4. Maka salah ne’ebe hetan-ona pena eh medida seguransa nian ba liberdade, bele hetan nafatin nia titularidade ba direitu fundamental nian, hela-de’it limitasaun inerente kona-ba kondenasaun no kona-ba ezekusaun nia ezijénsia rasik.
Artigu 33
(Habeas corpus)
1. Ema ida-idak ho ninia liberdade rasik iha direitu atu hetan providensia ba habeas corpus.
2. Habeas Corpus maka dalan klaran (interposto), tuir lei haruka, ba an rasik eh hosi ema seluk ruma ne’ebe iha direitu sivil tomak.
Juiz de’it maka hakotu-lia atu ema bele hetan habeas corpus iha loron ualu nia laran iha audiensia kontraditoria.
Artigu 34
(Garantia prosesu krimi nian)
1. Maksalah hotu-hotu ne’ebe hetan akuzasaun prezume inosente to’o wainhira juiz hakotu lia loloos ona. (kondenasaun judicial definitiva)
2. Maksalah iha direitu atu hili nia defensor atu tau matan ba nia iha hahalok hotu-hotu iha prosesu laran, no lei sei hakotu kona-ba kazu ruma ne’ebe defensor tenki iha oin.
3. Ema hotu-hotu iha direitu atu rona no atu defende nia an iha prosesu krimi nia laran.
4. Prova hotu-hotu iha valor no efeitu laek wainhira hetan hosi tortura, forsa, ofensa ba integridade fizika eh moral no intromisaun abuzivu iha vida partikular no iha uma hela fatin, korespondensia eh iha forma seluk komunikasaun nian.
Artigu 35
(Estradisaun no espulsaun)
1. Estradisaun bele hala’o de’it ho lia ne’ebe juiz hakotu (desizaun judisial).
2. Sei laiha estradisaun tamba motivu politiku.
3. Sei la iha estradisaun ba krimi ne’ebe tuir Estadu ida ne’ebe husu estradisaun ne’e bele hetan pena de morte eh prizaun perpetua eh ne’ebe admiti ho fundamentu katak wainhira halo estradisaun ba ema ne’ebe halo salah, nia bele hetan tortura eh tratamentu a’at eh degradante.
4. Labele halo espulsaun eh espatriasaun ba ema rainain ida hosi rai-laran.
Artigu 36
(Direitu ba honra no ba privasidade)
Ema ida-idak iha direitu ba honra, ba naran di’ak no ba reputasaun no direitu ba defende an rasik no la fo sai ninia moris rasik iha uma kain nian.
Artigu 37
(Labele viola uma tuur fatin no korespondensia)
1. Labele viola uma tuur fatin, korespondensia no mos meiu komunikasaun seluk ne’ebe partikular, hela de’it ba kazu hirak ne’ebe hateten ona iha lei kona-ba lia prosesu krimi nian.
2. Atu tama karik iha ema ruma nia uma tuur fatin, la tuir uma nain ninia hakarak, bele halo de’it ho ordem hakerek hosi autoridade judisial ne’ebe iha kbiit, tuir kazu no forma ne’ebe hakerek ona iha lei.
3. Atu tama karik iha ema ruma nia fatin iha kalan, la tuir uma nain ninia hakarak, ida ne’e labele duni halo, hela de’it ba kazu ruma ne’ebe lori ameasa bo'ot ba ema nia moris, ba isin nian, ba ema ne’ebe hetan iha uma ne’e nia laran.
Artigu 38
(Protesaun ba informasaun ema idaidak nian)
1. Rainain hotu-hotu iha direitu hetan lia loos kona-ba informasaun sira nia an rasik, ne’ebe informa ona eh hatama ona iha rejistu mekanografiku no manual ne’ebe hateten kona-ba sira an, bele mos husu atu halo rektifikasaun no aktualizasaun ruma ba informasaun hirak ne’e no iha mos direitu atu buka hatene informasaun ne’ebe hola ninia finalidade.
2. Lei maka defini loloos konseitu ba informasaun ema idaidak nian no ba kondisaun ne’ebe hala’o kona-ba nia tratamentu.
3. Labele informa ema idaidak nia informasaun kona-ba an rasik, konviksaun politiku, no filozofia nian, relijiaun, no filiasain ba partidu nian eh sindikal no origem etnika nian, wainhira dadus nain lako’i atu fo sai.
Artigu 39
(Uma kain, kazamentu no maternidade)
1. Estadu proteje uma kain nudar baze selular iha sosiedade no nudar kondisaun ne’ebe di’ak liu ba ema idaidak hodi dezenvolve an.
2. Ema hotu-hotu iha direitu atu harii no moris iha uma kain.
3. Kazamentu hatur iha ema feto no mane sira hakarak rasik no iha sira rua ninia direitu hanesan tuir lei haruka.
4. Soin diak no tau matan duni ba maternidade, fiar metin katak feto hotu-hotu hetan protesaun espesial durante isin rua no hahoris liu tiha, no ba feto trabalhadora hotu-hotu iha direitu ba dispensa hosi serbisu ka feriadu adekuadu ida iha molok hahoris eh hahoris liu tiha, sem lakon retribuisaun no regalia ruma tuir lei haruka.
Artigu 40
(Liberdade espresaun no ba informasaun )
1. Rainain hotu-hotu iha direitu ba liberdade espresaun no ba direitu atu hetan informasaun ruma, no tan informasaun loloos nian.
2. Hala’o knaar kona-ba liberdade espresaun no informasaun ninian, labele fo limite hosi sensura ruma.
3. Halao knaar ba direitu no liberdade nian ne’ebe hateten iha artigu ne’e, lei maka sei regula ho baze ba imperativu hodi fo respeitu bá lei inan no mos ema ida-idak nia dignidade.
Artigu 41
(Liberdade imprensa no meius komunikasaun sosial ninian)
1. Iha garantia ba imprensa nia liberdade no meius seluk tan, kona-ba komunikasaun sosial.
2. Liberdade imprensa komprende, hosi liberdade ba espresaun no hamoris/hakiak jornalistas, asesu fontes kona-ba informasaun, liberdade editorial, protesaun ba independensia no ba segredu profisional no mos direitu atu halo jornal, publikasaun ninian no meius difuzaun selu-seluk tan.
3. Labele permiti monopoliu kona-ba meios komunikasaun sosial.
4. Estadu hametin liberdade no independensia ba orgaun publiku kona-ba komunikasaun sosial, husi poder politiku no poder ekonomiku.
5. Estadu hametin ezistensia ba servisu publiku ida ba radiu no televizaun, ne’ebe senti livre, haree mos ba objetivu seluk, hanesan protesaun no divulgasaun kona-ba kultura no tradisaun Republika Demokratika Timor Leste nian, no fo garantia ba espresaun opiniaun eh hanoin ema barak ninian.
6. Estasaun emisora ba radiufusaun no radiu televizaun nian so bele hala’o ho lisensa tuir lei haruka.
Artigu 42
(Liberdade atu halibur no halo manifestasaun)
1. Ba rainain hotu-hotu fo garantia liberdade ba reuniaun pasifika ne’ebe lá iha kroat sei la presiza autorizasaun uluk.
2. Rekonese ema hotu-hotu nia direitu ba manifestasaun, tuir lei haruka.
Artigu 43
(Liberdade asosiasaun nian)
1. Rainain hetan liberdade ba asosiasaun, ho hanoin ida ne’ebe la hala’o violensia no halo tuir lei haruka.
2. Labele obriga ema ida atu halo parte ba asosiasaun ida ka hela nafatin kontra nia hakarak.
3. Iha bandu ba asosiasaun ne’ebe ho kro’at, asosiasaun militar eh paramilitar no organizasaun sira ne’ebe hakarak defende hanoin eh hatoo hahalok ho karater rasista ka ema rai liur eh haburas terrorismu.
Artigu 44
(Liberdade sirkulasaun)
1. Ema rainain hotu-hotu iha direitu atu bá mai no hetan nia hela fatin iha Territoriu Nasional nia laran.
2. Ema rainain hotu-hotu iha garantia bá direitu atu emigra livre deit , nune’e mos iha direitu atu fila fali mai nia rain.
Artigu 45
(Liberdade konsiensia nian, kona-ba relijaun no kultu )
1. Ema hotu tenki iha liberdade ba konsiensia, relijiaun no ba kultu maibe konfisaun relijiozu sira haketak ho Estado.
2. Labele halo tauk no labele diskrimina (hatun) ema ida tamba nia konviksaun relijioza.
3. Fo garantia objesaun ba konsiensia tuir lei haruka.
4. Fo garantia ba liberdade atu hanorin relijiaun ne’ebe deit tuir konfisaun religiosa ida-idak ninian.
Artigu 46
(Direitu partisipasaun politika)
1. Rainain hotu-hotu iha direitu atu partisipa, hosi nia rasik eh liu hosi reprezentante ne’ebe hili tiha ona tuir demokrasia, ba vida politika no ba asuntu publiku nian iha rai laran.
2. Rainain hotu-hotu iha direitu atu halo no partisipa iha partidu politiku sira.
3. Konstituisaun no organizasaun ba partidu politiku sira lei maka sei regula.
Artigu 47
(Direitu atu vota)
1. Ema rainain hotu-hotu ho tinan sanulu-resin-hitu ba leten, iha direitu atu vota no sei bele hili nia.
2. Halao direito sufrajiu katak ba ema ida-idak, ida ne’e hanesan dever siviku ida.
Artigu 48
(Direitu ba petisaun)
Ema rainain hotu-hotu iha direitu atu aprezenta petisaun, kesar no reklamasaun, mesak-mesak eh iha grupu, ba orgaun soberania sira, eh ba autoridade selu-seluk atu defende sira nia direitu, Lei-Inan, lei-oan eh ba interese hotu-hotu nian.
Artigu 49
(Defende soberania)
1. Ema rainain hotu-hotu iha direitu no dever atu kontribui ba defeza independensia, soberania no integridade territoriu nasaun nian..
2. Servisu militar halo tuir lei haruka.
TÍTULU III
DIREITU NO DEVER EKONÓMIKU, SOSIAL NO KULTURAL
Artigu 50
(Direitu ba servisu)
1. Ema rainain hotu-hotu feto eh mane iha direitu no dever atu halo servisu no livre atu hili nia profisaun.
2. Serbisu nain sira (trabalhador) iha direitu ba seguransa no hetan móos iha servisu fatin ba pagamentu, deskansu no mós ferias.
3. Labele hasai ema serbisu nain sira (trabalhador) karik laiha kauza justa (loloos) eh hosi motivu politiku, relijozu no idiolojiku deit.
4. Labele obriga ema serbisu, la halakon buat ne’ebe maka iha lejizlasaun kona-ba ezekusaun kastigu nian.
5. Estadu haburas kriasaun (hakiak) koperativa ba produsaun no fo tane ba empreza familia nian nudar fatin atu hetan serbisu.
Artigu 51
(Direitu ba greve, no labele para serbisu/lock-out)
1. Trabalhador sira iha direitu atu halo greve, se karik sira hala’o greve ne'e sei halo tuir lei haruka.
2. Lei defini kondisaun atu halo greve, hanesan hala’o knaar balu ne’ebe presiza ba seguransa no manutensaun ekipamentus ho instalasaun, nó mós servisu minimu ne’ebe tenki hala’o duni tanbá sosiedade nia presiza.
3. Labele halo lock-out.
Artigu 52
(Liberdade sindikal)
1. Trabalhador iha direitu atu forma sindikatu no mos asosiasaun profisional hodi bele defende nia direitu no nia interese.
2. Liberdade sindikal fahe ba, liberdade halo nia konstituisaun, tau naran, organizasaun, no mos regulamentu interno.
3. Sindikatus no asosiasaun sindikal, sira ne’e independente hosi estadu no patraun sira.
Artigu 53
(Direitu konsumidores nian)
1. Konsumidores sira iha direitu atu simu sasan no servisu ne’ebe maka iha kualidade, no mos atu hatene informasaun lo’os, kona-ba sasan sira ne’e atu proteje sira nia saude, seguransa no mos interese ekonomiku hanesan mos atu bele hadi’a buat ne’ebe aat.
2. Lei maka regula publisidade, bandu publisidade hirak ne’ebe subar, indiretu no bosok.
Artigu 54
(Direitu ba propriedade privada)
1. Ema hotu-hotu iha direitu ba propriedade privada, no bele sei fo ba ema seluk wainhira sei moris no mos wainhira nia mate tuir lei nia hala’o.
2. Propriedade privada labele usa atu estraga funsaun sosiedade ninian.
3. Atu hetan eh hasai ema ida nia propriedade privada hodi halo ba uzu publiku, tenki selu indeminizasaun ba rai na’in, tuir lei haruka.
4. Ema rai na’in nasional deit maka bele iha direitu ba propriedade privada rai na’in.
5. Rekomenda atu transfere ba dispozisoens finais no tranzitorias)
Artigu 55
(Obrigasaun Kontribuinte sira nian)
Rai na’in hotu-hotu ne’ebe iha prova katak iha rendimentu iha obrigasaun atu selu ba reseita publiku.
Artigu 56
(Seguransa no asistênsia sosial)
1. Rai na’in hotu-hotu iha direitu ba seguransa no asistensia sosial tuir lei haruka.
2. Estadu hola medidas tuir nia kbiit nasional nian hodi halo organizasaun ho nia sistema ida ba seguransa sosial.
3. Estadu apoia no fiskaliza tuir lei, ba serbisu, no funsaun instituisaun solidariedade sosial, no seluk tan,ne’ebe iha interese publiku wainhira lá iha lukru.
Artigu 57
(Saúde)
1. Estadu hatene katak ema hotu iha direitu ba saude asistensia medika sanitaria.
2. Estadu hala’o no harii serbisu nasional saude universal ba ema hotu-hotu, tuir nia kbiit, gratuitu/la selu hanesan lei haruka.
3. Servisu saude nasional tenki iha fatin barak, labele hamutuk de’it iha fatin ida, atu ema hotu-hotu bele halo parte.
Artigu 58
(Uma )
Ema hotu iha direitu ba nia an, nia familia atu iha uma ida ho nia dimensaun no kondisaun diak mo’os ho konforto atu bele iha intimidade ba ema ida-idak no privasidade familiar.
Artigu 59
(Edukasaun no kultura)
1. Estadu rekonhese no garante ba Rai-nain hotu nia direitu ba edukasaun no kultura, nune mos harii sistema ensinu baziku universal, obrigatoriu no wainhira bele, gratuito hanesan lei haruka.
2. Ema hotu iha direitu hanesan, ba oportunidade atu eskola no ba formasaun serbisu/profisaun nian.
3. Estadu rekonese no fiskaliza eskola partikular no koperativu sira.
4. Estadu tenki garante ba rainain hotu-hotu, tuir sira nia kapasidade, atu bele hetan eskola bo’ot kona-ba investigasaun sientifika no hamoris/haburas arte.
5. Ema hotu iha direitu atu goza no harii kultura hanesan nia obrigasaun atu haburas, defende no mos fo valor ba patrimonio kultural.
Artigu 60
(Propriedade intelectual)
Estadu garante no fo protesaun ba hamoris, produsaun no hala’o komersializasasun obra literariu, sientifiku no artistiku ninian, no mos fo protesaun ba direitu autor sira nian.
Artigu 61
(Inviromentu)
1. Ema hotu-hotu iha direitu atu moris iha ambiente ema moris nian ne’ebe isin di’ak, ekolojikamente ekilibradu, no iha obrigasaun atu proteje no halo di’ak ba jerasaun oin mai.
2. Estadu rekonhese katak iha nesesidade atu tau matan didi’ak no fo valor ba ita nia rai nia riku-soin.
3. Iha nia kapasidade laran, estadu tenki fo sai buat ne’ebe mak sei halo atu defende natureza hodi hala’o mos ekonomia.
PARTE III
ORGANIZASAUN PODER POLITIKU NIAN
TITULU I
PRINSÍPIU JERAL SIRA
Artigu 62
( Naran no exersísiu poder polítiku nian)
Poder politiku iha povu nia liman ne’ebe sei hala’o tuir Lei-Inan haruka.
Artigu 6 3
(Partisipasaun polítika rainain nian)
1. Partisipasaun direktu no aktivu hosi feto no mane sira iha vida polítika reprezenta kondisaun no instrumentu fundamental sistema demokrátiku ninian.
2. Lei halo promosaun kona-ba igualdade direitu síviku no polítiku nian no la diskrimina kona-ba sexu iha asesu ba kargu polítiku nian.
Artigu 64
(Prinsípiu renovasaun nian)
Ema ida labele hala’o nia knaar iha vida tomak, ka tuir tempu indeterminadu, wainhira kaer kargu politiku.
Artigu 65
(Eleisaun)
1. Orgaun eleitu soberania nian ho poder lokal sei hili tuir eleisaun, hosi eleisaun universal, livre, direto, sekreto ema ida votu ida, no periódiku.
2. Resenseamentu eleitoral ne’e obrigatóriu, ofisial no ida de’it no universal no sei atualiza iha eleisaun ida-idak.
3. Kampanha eleitoral hala’o tuir prinsipiu hirak tuir mai ne’e:
a) Liberdade ba propaganda eleitoral;
b) Oportunidade no tratamentu hanesan ba kandidatura hotu-hotu;
c) Imparsialidade na’in ulun boot publiku sira nian kona-ba kandidatura;
d) Transparênsia no fiskalizasaun sura votu nian.
4. Konversaun votu nian iha mandatu hala’o tuir sistema reprezentasaun proporsional;
5. Prosesu eleitoral sei regula tuir lei.
Artigu 66
(Referendu)
1. Rai-nain sira ne’ebe resenseadu iha territóriu nasional bele bolu atu fo sira nia votu iha referendo kona-ba asuntu ne’ebe importante ba interesse nasaun nian.
2. Prezidente Republika mak sei konvoka referendu, tuir proposta um terço hosi Deputadu sira no hetan aprovasaun hosi maioria dois terços membru Parlamentu Nasional nian, ka tuir proposta ne’ebe hahu hosi Governu.
3. Tuir lei-inan labele hala’o referendu kona ba sasan kompetênsia eskluzivu ba Parlamentu Nasional, Governu ka Tribunal nian.
4. Lei maka sei define prosesu referendu nian.
Artigu 67
(Órgaun soberania nian)
Orgaun soberania mak Prezidente Repúblika, Parlamentu Nasional, Governu no Tribunal sira.
Artigu 68
(Inkompatibilidade)
1. Titularidade kona-ba knaar Prezidente Repúblika nian, Prezidente Parlamentu Nasional, Prezidente Supremu Tribunal Justisa, Prezidente Tribunal Superior Administrativu, Fiskal no Kontas, Prokurador-Jeral Repúblika no membru Governu sei inkompatível entre sira.
2. Lei mak sei difine inkompatibilidade seluk tan.
Artigu 69
(Prinsípiu hafahe kbiit nian)
Orgaun soberania sira, iha sira nian relasaun resíproka no wainhira hala’o sira nia knaar, tenki tuir prinsípiu hafahe nian no interdependensia kbiit nian ne’ebe iha Lei-inan nia laran.
Artigu 70
(Partidu polítiku no direitu opozisaun nian)
1. Partidu polítiku sira ne’ebe partisipa iha orgaun kbiit polítiku nian tuir akordu ho sira nian reprezentatividade demokratika, bazeadu iha eleisaun universal no direto.
2. Sei rekonese katak partidu polítiku sira iha direitu kona ba opozisaun demokrátiku nian, nune-mos hanesan sira iha direitu atu simu informasaun, regular no direto, kona-ba hala’o asuntu prinsipal interese nasaun nian.
Artigu 71
(Organizasaun administrativa)
1. Governu sentral tenki iha reprezentasaun hosi nível eskalaun administrativu oin-oin iha rai laran.
2. Oe-Cusse Ambeno sei hala’o nia knaar tuir polítika administrativa ho regime ekonómiku espesial nian.
3. Ataúro sei iha estatuto ekonómiku rasik;
4. Organizasaun polítika-administrativa rai Repúblika Demokrátika Timor-Leste nian sei defini tuir lei.
Artigu 72
(Kbiit lokal)
1. Sei harii kbiit lokal ho ema ne’ebe kolektivu iha rai-laran ne’ebe iha orgaun reprezentativu, ho knaar atu organiza partisipasaun Rai-nain ida-idak nian kona-ba solusaun problema rasik iha sira nia komunidade no atu promove dezenvolvimentu lokal, no la afeta partisipasaun Estadu nian.
2. Organizasaun, kompetênsia, funsionamentu no kompozisaun orgaun kbiit lokal sei define tuir lei.
Artigu 73
(Publisidade ba actos sira)
1. Sei publika iha jornal ofisial acto normativu sira ne’ebe fo sai hosi órgaun soberania nian.
2. Se la publika karik actos sira ne’ebe numeru fo sai hodi uluk, ka seluk tan ne’ebe iha acto jeneriku hosi orgaun soberania no kbiit lokal nian, implika katak la iha kbiit jurídiku.
3. Lei mak determina kona-ba forma publisidade actos sira seluk nian, no konsekuensia wainhira sira la iha.
TÍTULU II
PREZIDENTE REPÚBLIKA
KAPITULU I
ESTATUTU, ELEISAUN NO NOMEASAUN
Artigu 74
(Definisaun)
1. Prezidente Repúblika mak Xefe Estadu, símbulu no garantia independênsia nasional no unidade Estadu nian ho funsionamentu regular instituisaun demokrática sira.
2. Prezidente Repúblika mak Komandante Supremu Forsas Armadas nian.
Artigu 75
(Elejibilidade)
1. Bele tuir kandidatura Prezidente Repúblika nian rainain timoroan sira ne’ebe, kumulativamente:
a) Rainain nanis;
b) Iha tinan mínimu 35;
c) Ho kapasidade diak;
d) Ne’ebe hetan proposta ho minimu rainain eleitor rihun lima.
2. Prezidente Repúblika iha nia mandatu too tinan lima nia laran no ninian knaar hakotu wainhira Prezidente foun eleitu simu posse.
3. Mandatu Prezidente Repúblika nian bele hetan renovasaun dala-ida deit.
Artigu 76
(Eleisaun)
1. Prezidente Repúblika foti tuir sufrájio universal, livre, diretu, sekretu no ida-idak.
2. Eleisaun Prezidente Repúblika nian hala’o tuir sistema votus maioria validu ida-idak nian, ne’ebe votus mutin laiha valor.
3. Wainhira kandidatu ida mak la hetan votus liu sorin-balu, sei hala’o fali eleisaun dala ida tan, liu tihan loron tolunulo loron votasaun dala-uluk..
4. Iha segunda volta kandidatu nain rua ne’ebe hetan liu votus no la hasai sira nia kandidatura mak bele tuir.
Artigu 77
(Posse no juramentu)
1. Prezidente Repúblika sei hetan investidura husi Prezidente Parlamentu Nasional nian no simu posse, tuir serimónia públika, iha Deputadu no representante orgaun seluk soberania sira nia oin.
2. Presidente foun sei simo posse iha loron ikus Prezidente Repúblika tuan nia mandatu, iha kasu eleisaun tuir fatin mamuk, tuir mai iha loron ualu liu tihan loron publikasaun resultadu eleitoral.
3. Iha loron investidura Prezidente Repúblika sei halo juramentu tuir mai ne’e:
“Hau Jura, tuir hau nia honra katak hau sei kumpri no haruka kumpri Lei-Inan no lei-oan sira no fo hau nia kbiit hotu hodi defende no hametin independensia no unidade nasional.”
Artigu 78
(Inkompatibilidade)
Prezidente Repúblika labele iha kargu politiku seluk eh knaar públika iha nível nasional no mos , iha kazu seluk, hala’o knaar privadu.
Artigu 79
(Responsabilidade kriminal no obrigasaun konstitusional)
1. Prezidente Repúblika sei iha imunidade wainhira hala’o ninian knaar.
2. Prezidente Repúblika sei hatan ba Supremo Tribunal Justisa nian, kona-ba krimi ne’ebe akontese wainhira hala’o nia knaar kona-ba violasaun iha obrigasaun Konstitusional
.
1. Sentensa sei fo sai husi Plenáriu Supremo Tribunal de Justisa nian iha prazu máximu loron 30 nia laran.
2. Sei hahu prosesu ne’e iha Parlamentu Nasional um quinto proposta nian ho deliberasaun aprovadu tuir maioria dois terços Deputadu hotu hotu nian.
3. Parlamentu Nasional mak sei hahu prosesu ne’e, iha proposta ida ne’ebe mai husi um quinto no deliberasaun, aprovadu tuir maioria dois terços Deputadu hotu hotu.
4. Sentensa sei fo sai husi Plenáriu Supremo Tribunal de Justisa nian iha prazu máximu loron 30 nia laran.
5. Kondenasaun ne’ebe sei hatoo hanesan hakotu Prezidente nian knaar ho mos labele kandidata fali ba eleisaun foun.
6. Krimi balu ne’ebe la kona-ba halao knaar nian, Prezidente Republika sei hatan mos iha Supremu Tribunal Justisa, ne’ebe iha kazu kondenasaun sei hetan hanesan hakotu Prezidente nian knaar wainhira nia hetan kondenasaun oh pena prisaun efetivo.
7. Iha kazu fo sai iha númerou uluk mai imunidade sei harii fali ho inisiativa Parlamentu Nasional konforme iha no. 32 artigu ida ne’e.
Artigu 80
(Falta)
1. Prezidente Repúblika labele sai husi territoriu nasional se laiha konsentimentu Parlamentu Nasional nian eh, karik se Parlamentu la halibur, tenki hetan husi Komisaun Permanente.
2. Mak la kumpri dispostu iha no.1 hanesa determina iha artigu ne’e, nia sei bele lakon ninian kargu, hanesa lei haruka dispostu iha artigu uluk mai.
3. Wainhira atu lao viagem privadu, ho durasaun la too loron sanulu resin lima, la presisa husu lisensa ba husi Parlamentu Nasional, maibe, Prezidente Repúblika tenki hatoo konhesimentu ba Parlamentu Nasional.
Artigu 81
(Renúnsia mandatu nian)
1. Prezidente Repúblika bele haruka mensagem ba Parlamentu Nasional atu renunsia ninian mandatu.
2. Renúnsia ne’e sei efetivu wainhira Parlamentu Nasional simu konhesimentu tuir mensagem, ne’e sei la hetan prejuízu wainhira fo sai iha jornal ofisial.
3. Wainhira Prezidente Repúblia renunsia ninian kargu, nia labele kandidata fali iha eleisaun oin mai, no mos tuir fali dala lima nia laran tuir kedas ninia renúnsia.
Artigu 82
(Mate, renúnsia ka inkapasidade permanente)
1. Iha kazu mate nian, renúnsia eh inkapasidade permanente Prezidente Repúblika, Presidente Parlamentu Nasional mak sei halao interinamente ninia knaar tomak, ne’ebe sei simu posse iha Deputadu no representante órgaun soberania seluk tan sira nia oin, sei simo nia investidura husi Prezidente Parlamentu Nasional ne’ebe kaer kargu ne’e.
2. Supremo Tribunal de Justisa mak sei deklara inkapasidade permanente no mos sei verifika mate ka lakon kargu Prezidente Repúblika nian.
3. Eleisaun foun Prezidente Repúblika nian tuir mate, renúnsia eh inkapasidade permanente tenki halo iha loron sianulu liu tia, tuir nia verificasaun eh declarasaun.
4. Sei harii fali Prezidente Repúblika ida ho mandatu foun.
5. Karik Prezidente eleitu la kohi simo kargu, mate eh hetan inkapasidade permanente, sei aplika disposisaun artigu ida ne’e nia.
Artigu 83
(Kazu esepsional sira)
1. Karik mate, renúnsia ka iha inkapasidade permanente ne’ebe akontese iha situasaun esepsional hanesan funu eh emerjensia naruk, eh hetan susar kona-ba ordem téknika eh material, ne’ebe defini tuir lei, no labele hala’o eleisaun Prezidente Repúblika nian tuir sufrájiu universal hanesan iha Artigu 76, Parlamentu Nasional mak sei hili ida iha sira nia let, liu tiha loron 90 tuir mai.
2. Iha kazu temi tihan iha númeru ukuk, Prezidente Repúblika eleitu sei kumpri ninia tempu iha too mandatu hotu, afoin nia bele kandidata fali ba eleisaun foun.
Artigu 84
(Substituisaun no interinidade)
1. Iha impedimentu temporáriu Prezidente Repúblika nian, Prezidente Parlamentu Nasional mak sei halao ninia knaar eh, se ida ne’e labele karik, ninia substitutu.
2. Mandatu Deputado Prezidente Parlamentu Nasional ka ninia substitutu, sei automatikamente suspensu iha tempu ne’ebe nia halao knaar ne’e, tuir substituisaun eh interinamente, kargu Prezidente Repúblika nian.
3. Knaar Deputadu Prezidente Repúblika substitutu nian eh interino, sei taka fatin tempu balu deit, tuir Regimentu Parlamentu Nasional nian.
KAPÍTULU II
KOMPETENSIA
Artigu 85
(Kompetensia rasik)
Prezidente Republika deit mak sei hala’o knaar hirak ne’e:
a) Promulga diploma legislativu no haruka publika resolusaun Parlamentu Nasional ne’ebe aprova akordu no ratifika tratadu konvensaun internasionl sira;
b) Hala’o kompetensia kona-ba knaar komandante Supremu Forsas Armadas nian;
c) Hala’o direitu veto kona-ba diploma legislativu nian, iha prazu loron 30 nia laran hahu husi loron simu nian;
d) Foti no fo posse ba Primeiru Ministru ne’ebe partidu eh aliasa partidu sira ho maoiria parlamentar sei foti, wainhira rona partidu polítiu sira ne’ebe iha Parlamentu Nasional;
e) Husu Supremu Tribunal Justisa nian kona-ba apresiasaun preventiva no ba fiskalizasaun abstrata konstitusionalidade normas nian, no mos haree inkonstitusionalidade tuir omisaun;
f) Hato’o ba referendu problema boot interese nasional nian, tuir termos Artigu 66;
g) Declara estado de sítio ka estadu emerjensia, tuir Parlamentu Nasional haruka, wainhira rona tihan ona Konsello Estadu, Governu no Konsello Superior Defesa no Seguransa sira;
h) Deklara funo ka halo dame, tuir proposta Governu nian, wainhira rona tihan ona ba Konselho Estadu, Governu no Konselho Superior Defesa no Seguransa sira, tuir Parlamentu Nasional haruka;
i) Rona tuir Governu, indulta ka komuta pena;
j) Konfere, tuir lei nian, títulu honorífikos, kondekorasaun no mos distinsaun.
Artigu 86
(Kompetensia kona-ba orgaun seluk)
Prezidente Repúblika nia knaar kona ba orgaun seluk:
a) Presidi Konsellu Superior Defesa no Seguransa;
b) Presidi Konsellu Estadu;
c) Marka, tuir lei, loron eleisaun ba Prezidente Repúblika no ba Parlamentu Nasional;
d) Halo konvokasaun estraordinaria Parlamentu Nasional nian, wainhira iha razasaun boot kona-ba interese nasional;
e) Fo sai mensagem ba Parlamentu Nasional no ba nasaun;
f) Hakotu Parlamentu Nasional, iha kazu krise boot institusional nian ne’ebe labele iha formasaun governu ka aprovasaun Orsamentu Jeral Estadu nian, iha tempu naruk liu loron nenulu, wainhira rona tihan ona ba partidu polítiku sira ne’ebe tur, no rona ba Konsellu Estadu, iha tempu ne’ebe laiha asistensia jurídika acto disolusaun nian, tenki haree tuir disposto Artigu 100;
g) Hatun Governu no exonera Primeiru-Ministru, wainhira Parlamentu Nasional la simo nia programa dala rua tu-tuir malu;
h) Foti, fo posse no hasai membru Governu, tuir proposta Primeiru-Ministru nian, iha termo n.o 2 Artig 105;
i) Foti membru rua ba Konsellu Superior Defesa no Seguransa;
j) Foti Prezidente Supremu Tribunal Justisa no fo posse ba Prezidente Tribunal Superior Administrativu, Fiskal no Kontas;
k) Foti Prokurador-Jeral Republika hodi hala’o knaar tinan ha’at nia laran;
l) Foti no hasae Adjuntu Prokurador Jeral Repulika sira tuir termus No.6. Artigu 133.
m) Tuir proposta Governu nian, Xefe Estadu-Maior-Jeneral Forsa Armada, Vise-Xefe Estadu-Maior-Jeneral Forsa Armada no Xefe Estadu-Maior Forsa Armada nian, rona tuir, iha kazu ikus mai ne’e, ba Xefe Estadu-Maior-Jeneral Forsa Armada nian;
n) Foti membru lima Konsellu Estadu nian;
o) Foti membru ida ba Konsellu Superior Magistratura Judisial no mos Konsellu Superior Ministériu Públiku nian.
Artigu 87
(Kompetensia relasaun internasional)
Prezidente Repúblika deit mak, iha dominiu kona-ba relasaun internacional sira:
a) Deklara funo, iha kazu agresaun efetiva eh iminente, no halo dame, tuir proposta Governu nian, rona tuir Konsellu Superior Defesa no Seguransa nian, wainhira Parlamentu Nasional eh ninia Komisaun Permanente fo auturizasaun;
b) Foti no hasai embaixador, representante permanente no enviado extraordináriu sira, tuir proposta Governu nian;
c) Simo karta kredensial no aseita akreditasaun representante diplomátiku estrangeiru sira;
d) Hamutuk ho Governu, sei hala’o prosesu kontratu hotu-hotu atu ramata akordu internacional iha area defesa no seguransa nian;
Artigu 88
(Promulgasaun no Veto)
1. Iha prazu loron tolunulo nia laran, hahu hosi simo diploma nara-naran ida husi Parlamentu Nasional atu promulga hanesan lei, Prezidente Repúblika bele promulga eh usa direitu veto nian, atu husu apresiasaun foun ida, iha mensagem fundamentada;
2. Se karik Parlamentu Nasional, iha prazu loron sianulo nia laran, konfirma voto tuir maioria absoluta Deputadu sira nian, ne’ebe serbisu hela, Prezidente Repúblika sei promulga diploma ida ne’e, iha prazu loron 8 nia laran, hahu husi loron ne’ebe nia simo;
3. Ne’e mos sei presisa, maioria dois terços Deputadu sira ne’ebe presente, no tenki liu maioria absoluta Deputadu sira ne’ebe serbisu hela, atu konfirma diplomas ne’ebe iha matéria sira hakerek iha Artigu 95;
4. Iha prazu loron haat’nulu nia laran sura husi simo diploma nara-naran ida Governu nian atu promulga, Prezidente Repúblika bele promulga eh usa ninian direitu veto, ne’ebe sei hakerek ba Governu tuir sentido veto nian.
Artigu 89
(Acto Prezidente Interino nian)
Prezidente Repúblika interino labele hala’o acto fo sai iha alíneas f), g), h), i), j), k), l), m) no n) iha artigu 86.
KAPÍTULU III
KONSELLU ESTADU NIAN
Artigu 90
(Konsellu Estadu)
1. Konsellu Estadu mak orgaun konsulta polítiku Presidente Repúblika nian, ne’ebe nia preside.
2. Halo parte Konsellu Estadu mak:
a) Ex-Prezidente Repúblika sira ne’ebe la’os destituídu;
b) Prezidente Parlamentu Nasional nian;
c) Primeiru-Ministru;
d) Rai-nain lima eleitu hosi Parlamentu Nasional ho harmonia tuir prinsípiu reprezentasaun proporsional, iha períodu kona-ba durasaun legislatura nian, ne’ebe la’os membru orgaun soberania nian;
e) Rai-nain lima foti hosi Prezidente Repúblika, iha períodu kona-ba durasaun nian mandato nian, ne’ebe la’os membrus orgaun soberania nian.
Artigu 91
Kompetensia, organizasaun no funsionamentu
Konsellu Estadu nian)
1. Konselhu Estadu maka bele:
a) Fo sai kona-ba disolusaun Parlamentu Nasional;
b) Fo sai kona-ba demisaun Governu nian;
c) Fo sai kona-ba deklarasaun funu no atu halo dame;
d) Fo sai kona-ba kazu seluk tan ne’ebe iha Lei Inan no jeral, hato’o konsellu ba Prezidente Repúblika wainhira nia hala’o ninia knaar, no se karik nia husu.
e) Halo ninian Rejimentu interno;
2. Reuniaun Konsellu Estadu nian la’os publiku.
3. Lei mak defini organizasaun funsionamentu Konsellu Estadu.
TITULU III
PARLAMENTU NASIONAL
KAPITULU I
ESTATUTU NO ELEISAUN
Artigu 92
(Definisaun)
Parlamentu Nasional orgaun soberania Republika Timor-Leste nian no nia representa ema Timoroan tomak no nia kbiit atu halu lei, atu fiskaliza no atu halo desizaun polítika.
Artigu 93
(Eleisaun no kompozisaun)
1. Ema hili Parlamentu Nasional liu hosi sufrájio universal, livre, direktu, igual, sekretu no ida-idak.
2. Parlamentu Nasional sei iha 52 membrus/deputadus mínimo no máximo 65 membrus/deputadus.
3. Lei mak sei regula kona-ba oin sa atu halo eleisaun, nusa atu hili ema/deputadus ho prosedimentu seluk tan kona ba eleisaun.
4. Deputadu hala’o sira knaar iha parlamentu durante tinan lima.
Artigu 94
(Imunidade)
1. Deputadu sira la hatan ba sivil, kriminal eh disiplinarmente wainhira sira vota ka hasai sira nia opiniaun durante sira sei hanesan Deputadu;
2. Imunidade/kekebalan Parlamentu Nasional nian bele hasai tuir buat ne’ebe hakerek iha Rejimentu Parlamentu nian.
KAPÍTULU II
KOMPETENSIA
Artigu 95
(Kompetensia Parlamentu Nasional)
1. Kompete ba Parlamentu Nasional halo lei kona-ba asuntus bázikus polítika interna ho esterna nasaun nian.
2. Parlamentu Nasional deit mak halo lejislasaun kona-ba:
a) Rai ketan RDTL nian, tuir artigo no. 4;
b) Limites bé tasi laran Timor nian no mos zona ekonómika esklusiva ho tan direitou ne'ebe ita iha kona ba tasi okos ne’ebe iha ita nia Rain laran;
c) Símbolos Nasionais nian, tuir no.2 Artigo 14;
d) Rainain;
e) Direitus, liberdades no garantias;
f) Estadu no kapacidade ema nian, direitu família nian no mos jerasaun ne’ebe sei mai;
g) Divizaun oin sa fahe Rai Timor;
h) Lei atu halo eleisaun no mos Regime Referendu nian;
i) Partidu sira no mos asosiasaun polítika.
j) Deputado sira nia Estatuto;
k) Estatuto ema ne’ebe halo knaar iha Estadu;
l) Bases sistema hanorin nian;
m) Bases sistema seguransa sosial no mos saúde nian;
n) Suspensaun garantias konstitucionais no mos deklrarasaun estado de sítio ho tan estadu de emergência;
o) Polítika Defesa no Seguransa;
p) Polítika Fiskal;
q) Regime orsamental.
3. Parlamentu National sei halo mos:
a) Ratifika nomeasaun Prezidente do Supremu Tribunal Justisa nian no mos eleisaun Prezidente Tribunal Superior Administrativu, Fiskal no Kontas nian;
b) Deside kona-ba relatoriu knaar Governu nian;
c) Hili membru ida ba Konsellu Superior Magistratura Judisial nian no mos Konsellu Superior Ministeriu Publiku;
d) Desidi kona-ba Planu no Orsamentu Estadu nian no mos relatoriu ne’ebe hala’o orsamentu ne’e;
e) Fiskalisa oin sa Estadu hala’o orsamentu nasional;
f) Aprova no mos fo sai akordu ho tan ratifika tratadus no mos konvensoens internasional;
g) Fo'o amnistia;
h) Fo'o autorizasaun ba'a Prezidente Republika atu visita nasaun seluk;
i) Maioria dois tersus Deputados sira aprova revizaun ba Lei-inan;
j) Autoriza no mos konfirma deklarasaun estado de sitio(quando ema serku aleu rai) no tan estadu emerjensia;
k) Hato’o hodi husu ba Prezidente Republika atu halu referendo kona-ba asuntus interesse nasional nian;
4. Parlamentu National sei halo mos:
a) Foti nia Prezidente no mos membrus seluk Mesa;
b) Foti membrus nain lima atu halo Konsellu Estadu;
c) Halo no mos aprova nia Rejimentu;
d) Forma Komisaun permanente no mos hamoris Komisaun selu-seluk iha parlamentu nia laran;
Artigu 96
(Autorizasaun legislativa)
1. Parlamento Nasional bele autoriza Governu atu halo lejislasaun ba sasan sira tuir mai ne'e:
a) Definisaun krimi nian, kastigu, sukat seguransa nian, no mos nia presupostu;
b) Definisaun prosesu sivil no krimi nian;
c) Organizasaun judisiariu nian no estatutu majistradu nian;
d) Rejime jeral funsaun publiku nian, no estatutu funsionariu sira no mos Estadu nia responsabilidade;
e) Baze jeral organizasau nian no administrasaun publiku;
f) Sistema monitariu
g) Sistema finansa no banku nian;
h) Definisaun ba baze politika ida ba defeza meiu-ambiente nian no dezenvolvimentu sustentavel;
i) Rejime tomak radiu-difuzaun ninian, televizaun no komunikasaun hotu-hotu masas sira nian;
2. Lei autorizasaun lejislativu tenki hateten sai objektivu, no sentidu, no halo naruk no durasaun ba autorizasaun, mak sei bele prorroga.
3. Lei autorizasaun lejislasaun nian labele uza dala rua, no hotú ho demisaun Governu nian, ho termu legislatura nian ka ho desolusaun Parlamentu Nacional nian.
Artigu 97
(Inisiativa lei nian)
1. Hahu lei nian pertense ba:
a) Deputadu sira;
b) Bankada Parlamentar sira;
c) Governu.
2. Labele aprezenta projetu no proposta lei nian ka alterasaun ne’ebe, iha tinan ekonomiku ne’ebe la’o daudaun, tama aumentu kona-ba despeza no reseita Estadu ninian ne’ebe mai iha Orsamentu no mos Orsamentu Retifikativu.
3. Projetu no Proposta lei nian maka la simu labele halo fali iha nafatin sesaun lejislativu ida ne’ebe sira aprezenta tiha ona.
4. Projetu no Proposta lei nian, maka la vota ida, bele halo fali iha sesaun lejislativu ida tuir mai, salvu termu lejislatura nian.
5. Proposta lei nian hotu remata ho Governu nia demisaun.
Artigu 98
(Parlamentu haree ba atu lejislativu sira)
1. Diploma lejislativu sira Governu nian, salvu hirak ne’ebe aprovadu wainhira nia hala’o hela knaar kompetensia lejislativu eskluziva, bele hato’o ba Parlamentu Nasional atu haree, kona-ba vijensia ka halo alterasaun, wainhira Deputadu kintu ida (¹/5) husu iha loron tulu-nulu liu tiha publikasaun, hasai tiha tempu suspensaun funsionamentu Parlamentu Nasional ninian.
2. Parlamentu Nasional sei bele suspende tomak ka balu de’it, vijênsia diploma lejislativu to nia apresiasaun.
3. Suspensaun ne’e kotu wainhira liu tiha reuniaun plenaria sanulu sem ke Parlamentu Nasional apresia tiha diploma ne’e.
4. Karik aprova tiha atu hakotu nia vijênsia, diploma ne’e hotu iha loron nebe’e rezolusaun nia publikasaun sai iha jornal ofisial no labele halo tan publikasaun wainhira sesaun lejislativa ida ne’e sei hala’o hela.
5. Karik, wainhira husu tiha atu haree, maka Parlamentu Nasional seidauk hateten sai kona-ba ida ne’e ka, wainhira halo tiha ona deliberasaun atu hatama emenda sira maka seidauk vota ba lei ne’e to’o sesaun legislativa ida ne’ebe hala’o daudaun remata, liu tiha reuniaun plenária sanulu resin lima, konsidera prosesu neé la vale ona.
KAPITULU III
ORGANIZASAUN NO FUNSIONAMENTU
Artigu 99
(Lejizlatura)
1. Lejislatura komprende sesaun lejizlativa lima no sesaun lejizlativa ida idak iha durasaun tinan ida nian.
2. Periodu normal funsionamentu Parlamentu Nasional nian define hosi Rejimentu.
3. Parlamentu Nasional halibur tuir konvokasaun Presidente nian.
4. Parlamentu Nasional halibur iha sesaun estraordináriu wainhira de’it maka Komisaun Permanente desidi nune’e, ne’ebe Deputadu tersu ida ('/3) maka husu ka Presidente Republika ninian maka husu atu trata lia espesifiku balu.
5. Wainhira hetan disolusaun karik, Parlamentu Nasional ne’ebe foin hili hahu lejislatura foun, ho dada tan nia durasaun ba tempu ne’ebe presisa atu kompleta periódu ida ne’ebe korespondente ba sesaun lejislativa ne’ebe hala’o daudaun to’o loron eleisaun nian.
Artigu 100
(Disolusaun)
1. Parlamentu Nasional labele hetan disolusaun liu tiha fulan neen wainhira hili nia, iha semestre ba dala ikus mandatu Presidente Republika nian ka durante vijênsia estadu de sitiu ka estadu emerjensia nian, ho penalidade inezistensia jurídika atu disolusaun nian.
2. Disolusaun Parlamentu Nasional nian la prejudisial ba subsistensia mandatu Deputadu sira nian too bá Parlamentu nia reuniaun ba dala uluk wainhira liu tiha eleisaun subsekuente sira.
Artigu 101
(Partisipasaun membru sira Governu nian)
1. Governu nia membru sira iha direitu atu mosu iha reuniaun plenária sira Parlamentu Nasional nian no bele hato’o sira nia lian fuan, tuir Rejimentu nia dalan.
2. Sei iha mos sesaun pergunta sira nian ba Governu haliu hosi Deputadu sira, tuir rejimentu nia dalan.
3. Parlamentu Nasional ka nia komisaun sira bele husu partipasaun hosi membru sira governu ninian iha sira nia serbisu.
KAPITULU IV
KOMISAUN PERMANENTE
Artigu 102
( Komisaun Permanente)
1. Komisaun Permanente halo la’o servisu nafatin iha periodu ne’ebe Parlamentu Nasional remata hela, iha intervalu sesaun no mos iha kazu selu-seluk previstu iha Konstituisaun.
2. Komisaun Permanente hahu ho Prezidente Parlamentu Nasional nian no mos halo parte Visi-Prezidente no mos Deputadu sira ne’ebe hatudu hosi partidu sira, iha akordu ho representante iha Parlamentu.
3. Kompete ba Komisaun Permanente, nomeadamente:
a) Akompanha servisu sira Governu nian no mos administrasaun nian;
b) Koordena servisu sira Komisaun Nasional nian;
c) Promove konvokasaun Parlamentu Nasional nian;
d) Prepara no organiza sesaun sira Parlamentu Nasional nian;
e) Autoriza deslokasaun Prezidente Republika nian iha rai laran;
f) Diriji relasaun sira husu Parlamentu Nasional no mos parlamentu no instituisaun análogas paizes seluk nian;
g) Autoriza deklarasaun estadu de sitiu nian no estadu emerjensia nian.
TITULU IV
GOVERNU
KAPITULU I
DEFINISAUN NO ESTRATURA
Artigu 103
(Difinisaun)
Governu orgaun soberanu ida ne’ebe iha respon sabilidade atu hala’o no ezekuta politika jeral nasaun nian no mos orgaun superior Administrasaun Publika nian.
Artigu 104
( Kompozisaun)
1. Halo parte Governu Primeiro-Ministru, Ministru sira no Sekretariu Estadu nian.
2. Bele mos tama iha Governu Vice-Primeiru-Ministru no Vice-Ministru ida ka liu tan.
3. Numeru ba designasaun no mos atribuisaun ministeriu no sekretariu Estadu nian sei define hosi diploma lejislativu Governu nian ka hosi dekretu nomeasaun hosi titulares sira ne'e.
Artigu 105
(Konsellu Ministru sira nian)
1. Konsellu Ministru sira nian sei konstituidu hosi Primeiru Ministru, Vise-Primeiru Ministru se iha no Ministru sira.
2. Primeiru Ministru mak sei presidi no konvoka Konsellu Ministru.
3. Karik bele konvoka atu partisipa iha reuniaun Konsellu Ministru nian laiha direitu ba votu, Vise-Ministru sira se iha no mos sekretariu estadu sira.
Artigu 106
(Nomeasaun)
1. Partidu ne’ebe manan ka husi aliansa partidu sira ne’ebe iha nia ema barak iha Parlamentu, mak sei hatudu primeiru ministru haefoin mak prezidente Republika mak sei hili.
2. Membru sira seluk husi governu, prezidente mak sei hili ho xefe ministru nia proposta.
Artigu 107
(Responsabilidade governu nian)
Governu hatan ba Prezidente Republika no parlamentu nasional nia oin kona ba kondisaun no esekusaun politika interna no esterna tuir Lei-ianan no mos iha lei oan.
Artigu 108
(Governu nia programa)
1. Wainhira hili tiha, governu tenki hala’o nia programa ne’ebe sei tuir objetivu no atividade ka serbisu tuir medida sira ne’ebe atu usa liu liu orientasaun politika nian, pretende tuir dominiu atividade governu.
2. Primeiru ministru hato’o programa governu nian ne’ebe Konsellu Ministru mak aprova ho apresia husi parlamentu nasional iha prazu a’as liu loron tolunulu husi loron nebe hahu funsaun governu nian.
Artigu 109
(Apresiasaun programa governu nian)
1. Programa governu nian sei hato’o ba parlamentu nasional atu hetan apresiasaun, no karik parlamentu la funsional, mak tenki konvida ka konvoka sira ba asuntu idan ne.
2. Debate programa governu nian labele liu loron lima no too ramata, grupu ida-idak iha Parlamentu bele husu rejeisaun eh governu bele husu voto konfiansa ida.
3. Rejeisaun ba programa governu eziji apoio maioria deputado nian ne’ebe sei hala’o hela nia knaar.
Artigu 110
(Husu voto konfiansa)
Governu bele husu ba Parlamentu Nasional halo aprovasaun ba voto konfiansa ida kona ba deklarasaun politika Jeral nian eh ba asuntu seluk importante ba interese nasional
Artigu 111
(Mosaun sensura)
1. Ho inisiativa ¼ deputados ne’ebe sei hala’o hela knaar, Parlamentu Nasional bele halo voto sensura ida ba Estadu, kona ba nia programa eh buat seluk ne’ebe relevante ba interese nasional
2. Karik mosaun sensura la hetan apoio, ba sira ne’be asina mosaun ne’e, labele apresenta fali mosaun seluk, iha sesaun ne’ebe hanesan.
Artigu 112
(Demisaun ba governu)
1. Bele hakotu governu nia knaar, wainhira
a) Hahu lejislasaun foun
b) Wainhira prezidente Republika simu pedidu demisaun husi Primeiru Ministru
c) Wainhira Primeiru Ministru mate ka hetan susar ba nia isin lolon iha nia moris tomak
d) Sei la simu programa Governu nian dala rua tutuir malu
e) Sei la simu aprovasaun ba votu konfiansa
f) Aprovasaun mosaun sensura nafatin nia knaar husi maioria deputadu ne’ebe sei hala’o
2. Prezidente Republika sei bele hatan ba Parlamentu Nasional wainhira tuir kazus ne’ebe fo sai iha numeru uluk, wainhira rona tiha ona husi Konsellu Estado sei hatudu mos katak tenki kaer metin instituisaun demokratiku.
Artigu 113
(Responsabilidade kriminal membrus governu nian)
1. Wainhira membru Governu ida akuzadu lolos ba krimi ne’ebe nia pena iha kadeia boot liu tinan rua,tenki hapara nia knaar atu bele foti auto.
2. Karik iha krimi ne’ebe pena iha kadeia to deit tinan rua, parlamentu nasional mak sei hakotu karik membru Governu ne’e bele hapara nia knar ka lae.
Artigu 114
(Imunidade membrus governu nian)
1. Imunidade laiha membru Governu ida bele detidu ka dadur wainhira Parlamentu Nasional seidauk fo lisensa, so bele iha kauza ne’ebe ema kaer rasik ho liman, no nian kadeia ne liu tinan rua
KAPITULU III
KOMPETENSIA
Artigu 115
(Governu nia kompetensia)
1. Governu nia knaar maka:
a) Define hala’o politika jeral nasaun nian, wainhira hetan tiha aprovasaun husi Parlamentu Nasional;
b) Garanti ba rai-nain sira, direitu ba liberdade fundamental;
c) Hametin ordem publiku no disiplina sosial;
d) Prepara Planu no Orsamentu Jeral Estadu nian hodi hala’o wainhira hetan tiha aprovasaun husi Parlamento Nasional;
e) Halo regulamento ba knaar ekonomia no mos sektor sosial;
f) Prepara, negosia tratadu no akordu, selebra, aprova, adere, no fo sai akordu internasional sira ne’ebe la’os Parlamentu Nasional eh Prezidente Republika nia kompetensia;
g) Defini no hala’o politika interna nasaun nian;
h) Hametin RDTL nia representasaun iha relasaun internasional sira;
i) Diriji setor sosial no ekonomia Estadu nian;
j) Diriji politika serbisu no seguransa sosial nian;
k) Fo garantia defeza no hametin riko-soin publiku nian no mos riku-soin Estadu nian;
l) Diriji kordena ativididades Ministerius nian no instituisaun sira seluk ne’ebe iha Konsellu Ministro nia okos;
m) Haburas dezenvolvimento setor koperativo no mos fo tulun ba produsaun familia lian;
n) Fo tulun ba inisiativa ekonomika privada;
o) Hala’o knaar no mos hola medida ne’ebe presia ba dezenvolvimento ekonomia sosial atu hodi haree nesesidade komunidade timoroan sira;
p) Hala’o knaar sira seluk husi Lei-inan eh lei haruka;
2. Tama mos ba governu nia knaar ho orgaun sira seluk;
a) Hato’o proposta lei nian no resolusaun ba Parlamentu Nasional;
b) Hato’o ba Prezidente Republika deklarasaun kona ba funu no hari paz;
c) Hato’o ba Prezidente Republika deklarasaun Estadu de sitiu eh ba Estadu emerjensia;
d) Hato’o ba Prezidente Republika atu halao rerferendu, ba problema sira ne’ebe iha relevansia be interese nasional;
e) Hato’o ba Prezidente Republika atu foti embaixadores, representantes permanente no enviadu extraordinariu sira;
3. Governu deit mak iha kompetensia lejislativa ba materia sira ne’ebe kona-ba nia organisaun rasik no mos administrasaun direta no indireta Estadu nian.
Artigu 116
(Kompetensia Konsellu Ministru sira nian)
Konsellu Ministro nia knaar mak:
a) Fo sai hahalok jeral politika Governu nian no mos oin sa atu halao hala’o politika ne’e.
b) Delibera kona ba usu voto konfiansa ida be Parlamentu Nasional
c) Aprova proposta lei no mos rezolusaun sira;
d) Aprova diploma legislativo hanesan mos akordu internasional sira ne’be sei la liu husi Parlamentu Nasional;
e) Aprova lei governu nian nebe kona ba aumenta no hamenus reseita despeza publiku nian;
f) Aprova planu;
Artigu 117
(Kompetensia membru governu nian)
1. Primeiro ministru nia knaar mak:
a) Xefe ba governu;
b) Preside Konsellu ministro;
c) Diriji no orienta politika Jeral governu nian no mos kordena ministro sira nia knar, maibe labele prejudika ministro ida-idak nia knaar iha ida idak nia departamento;
d) Hato’o ba Prezidente republika kona ba asuntu politiku interna no externa governu nian;
e) Hala’o funsaun seluk-seluk ne’ebe konstituisaun hato’o;
2. Ministru sira nia knaar mos mak:
a) Hala’o politika sira ne’ebe kona ba sira nia ministeriu;
b) Hametin relasaun Governu no orgauns Estadu sira iha ministeriu ida -idak nian.
Diploma lejislativo governu nian, primeiru ministru mak sei asina no mos ministru sira mak iha kbiit atu hala’o material ne’e.
TITULU V
TRIBUNAL SIRA
KAPITULU I
TRIBUNAL SIRA NO MAJISTRATURA JUDISIAL
Artigu 118
(Knaar jurisdisional)
1. Tribunal sira maka orgaun soberania ho konpetensia atu hala’o justisa hodi povu nia naram.
2. Wainhira hala’o nia knaar, tribunal sira iha direitu atu servisu hamutuk ho autoridade sira seluk.
3. Desizaun ne’ebe tribunal sira fo ona tenki halo tuir duni no hela hanesan aas liu desizaun autoridade sira seluk nian.
Artigu 119
(Independensia)
Tribunal sira independente no sira sei halo tuir de’it Lei-Inan no lei-oan sira haruka.
Artigu 120
(Apresiasaun ba inkonstitusionalidade)
Tribunal sira labele halo ukun ka norma ne’ebe kontra Lei-Inan eh prinsipiu sira ne'ebe konsagra iha nia laran.
Artigu 121
(Juis sira)
1. Knaar jurisdisional ne'e juis sira nian de’it, ne’ebe simu knaar tuir lei haruka.
2. Wainhira hala'o sira nia kna'ar, juis sira independente no sira so bele halo tuir de'it buat ne’ebe iha Lei-Inan, lei-oan no mos tuir sira nia konsiensia.
3. Labele hasai, hapara, muda, fo reforma eh hatun juis sira, se lei la haruka.
4. Atu garante nia independensia , juis sira labele lori responsabilidade kona-ba desizaun no lia ne’ebe sira hakotu, salvu iha kazu sira ne'ebe hakerek iha lei.
5. Lei regula organizasaun judisiaria no mos estatutu juis sira nian.
Artigu 122
(Eskluzividade)
Juis sira labele halo servisu publiku eh partikular seluk-seluk, maibe bele de'it hala’o knaar kona-ba hanorin nian eh investigasaun sientifika kona-ba lei, tuir lei haruka.
Artigu 123
(Kategoria tribunal sira nian)
1. Republika Demokratika Timor-Leste iha tribunal hirak ne'e:
a) Supremu Tribunal Justisa nian ho tribunal judicial sira seluk;
b) Tribunal Superior Administrativu, Fiskal no Kontas no tribunal administrativu primeira instansia nian.
c) Tribunal militar sira nian.
2. Sei bandu tribunal esepsaun sira, no sei laiha tribunal espesial atu tesi-lia kona-ba kategoria krimi balu nian.
3. Bele iha tribunal maritimu no arbitrariu sira.
4. Lei mak determina tribunal sira nia konstituisaun, organizasaun no sira nia funsionamentu, nudar hakerek tiha ona iha numeru sira liu ba ne’e.
5. Lei bele institusionaliza instrumentu no forma kompozisaun ne’ebe la’os konflitu jurisdisional nian.
Artigu 124 )
(Tribunal Supremu Justisa nian)
1. Supremu Tribunal Justisa mak orgaun boot liu iha orgaun hierarkia tribunal judisial hotu-hotu ninian, no mos fo garantia atu aplika lei oin ida de’it ho jurisdisaun iha nasaun tomak nia laran.
2. Kompete mos ba Supremu Tribunal Justisa nian atu administra justisa ba buat ne’ebe kona-ba lia juridiku-konstitusional no eleitoral.
3. Prezidente Republika mak foti Prezidente Supremu Tribunal Justisa nian, ne’ebe hili husi juis sira iha Supremu Tribunal Justisa, ba tinan hat nia laran.
Artigu 125
(Knaar no Kompusisaun)
1. Supremu Tribunal Justisa hala’o:
a) Iha seksaun sira, hanesan tribunal primeira instansia nian, iha kazu hirak ne’ebe tuir lei haruka.
b) Iha plenariu, hanesan tribunal segunda no instânsia ida de’it, iha kazu sira ne'ebe hakerek loloos ona iha lei.
2. Halo parte Supremu Tribunal Justisa nian juis karreira nian, Majistradu Ministeriu Publiku nian eh jurista sira ne’ebe iha naran boot, iha numeru ne’ebe lei mak sei determina, nune’e:
a) Ida, Parlamentu Nasional mak hili;
b) Sira seluk Konselhu Superior Majistratura Judisial mak mak hili.
Artigu 126
(Kompetensia konstitusional no eleitoral)
1. Kompete ba Supremu Tribunal Justisa nian, iha area lia juridiku-konstitusional nian:
a) Apresia no deklara inkonstitusionalidade no ilegalidade actos legizlativu no norma sira orgaun Estadu ninian;
b) Hare uluk konstitusionalidade no ilegalidade kona-ba diploma lejislativu no referedum nian.
c) Hare kona-ba inkonstitusionalidade tamba omisaun;
d) Desidi, iha sede rekursu nian, kona-ba dezaplikasaun ba norma sira ne’ebe tribunal instansia sira hare hanesan inkonstitusional;
e) Hare legalidade kona-ba konstituisaun partidu politiku sira nian no sira nia koligasaun, no haruka halo sira nia rejistu eh hamate sira tuir Lei-Inan no lei-oan sira haruka.
f) Hala’o kompetensia selu-seluk ne’ebe Lei-Inan no lei-oan sira hato’o.
2. Kona-ba eleisaun sira, kompete ba Supremu Tribunal Justisa nian:
a) Hare ba kondisaun legal ne’ebe tenki iha atu hala’o kandidatura Prezidente Republika nian;
b) Tesi-lia iha instansia ida ikus nian ba regularidade no validade actos prosesu eleitoral nian, tuir lei ne’e haruka;
c) Fo validade no fo sai rezultadu prosesu eleitoral nian.
Artigu 127
(Elijibilidade)
1. So bele sai membru Supremu Tribunal Justis nian, juis karreira sira, majistradu Ministeriu Publiku nian, jurista sira ne’ebe iha naran boot ne’ebe ema rainain.
2. La’os de’it iha kondisaun hirak ne’ebe temi sai iha No. ida ikus ba ne’e, lei mos bele define seluk tan.
Artigu 128
(Konsellu Superior Majistratura Judisial nian)
1. Konsellu Superior Majistratura Judisial, orgaun jestaun no disiplina ida majistradu judisial sira nian, ne’ebe iha kompetensia atu foti, hatun, muda no hasa’e juis sira.
2. Juis Prezidente Supremu Tribunal Justisa nian mak preside Konsellu Superior Majistratura Judisial, ne’ebe halo parte vogal sira tuir mai ne’e:
a) Ida, Prezidente Republika mak hili;
b) Ida, Parlamentu Nasional mak foti;
c) Ida, Governu mak hili;
d) Ida, majistradu judisial mak hili husi sira nia let.
3. Lei maka regula Konsellu Superior Majistratura Judisial nia kompetensia, organizasaun no nia knaar.
Artigu 129
(Tribunal Superior Administrativu, Fiskal no Kontas)
1. Tribunal Superior Administrativu, Fiskal no Kontas orgaun boot liu iha hierarkia tribunal administrativu, fiscal no kontas sira, sem halo aat ba kompetensia ne’ebe Supremu Tribunal Justisa nian iha.
2. Juis sira maka foti Prezidente Tribunal Superior Administrativu, Fiskal no Kontas ninian hosi nia let atu hala’o mandatu ida iha tinan haat nia laran.
3. Kompete ba Tribunal Supremu Administrativu, Fiskal no Kontas, nudar instansia mesak ida, halo fiskalizasaun kona-ba legalidade despeza publika no julgamentu kona-ba Estadu nia kontas.
4. Kompete ba Tribunal Superior Administrativu, Fiskal no Kontas no mos ba tribunal administrativu no fiscal primeiru instansia sira atu:
a) Tesi- lia ba hahalok hotu ne’ebe iha konflitu laran, ne’ebe mosu hosi relasaun juridiku administrativu no fiskal sira;
b) Tesi-lia ba rekursu kontensiosu ne’ebe halo interposto ba desizaun sira ne’ebe mai hosi orgaun sira Estadu nian no nia ajente sira.
c) Hala’o kompetensia sira seluk hotu ne’ebe lei hato’o.
Artigu 130
(Tribunal Militar sira)
1. Kompete ba tribunal militar sira atu tesi-lia iha instansia ida uluk kona ba krimi natureza militar nian.
2. Lei mak determina kompetensia, organizasaun, kompozisaun no knaar tribunal militar sira nian.
Artigu 131
(Tribunal nia Audiensia)
Audiensia tribunal sira ne’e publiku, maibe se tribunal rasik deside katak iha fundamentu atu salvaguarda ema nia dignidade, moral publiku, seguransa nasional eh atu karante nia funsionamentu normal tribunal bele desidi kontrariu
KAPITULU II
MINISTERIU PUBLIKU
Artigu 132
(Funsaun no estatutu nian)
1. Ministeriu Publiku reprezenta Estadu, hala'o asaun penal, hametin defeza ba labarik sira, ema ne’ebe la’iha, no inkapasitadu sira, defende legalidade demokratiku no promove halo-tuir lei.
2. Ministeriu Publiku konstitui majistratura ida ne’ebe organizadu ho hierarkia, ne’ebe iha Prokurador-Jeral Republika nia okos.
3. Wainhira hala’o nia funsaun, majistradu Ministeriu Publiku sira sujeitu ba kriteriu legalidade nian, objetividade, izensaun, no sujeisaun tuir diretiva no orden sira ne’ebe iha lei.
4. Ministeriu Publiku goza nia estatutu rasik, maibe nia ajente sira labele hetan transferensia, suspensaun, apozentasaun eh demisaun iha deit kazu sira ne’ebe hakerek iha lei.
5. Nomeasaun, kolokasaun, transferensia no promosaun ajente Ministeriu Publiku sira nian no ezersisiu asaun disiplinar sira kompete ba Prokuradoria Jeral Republika.
Artigu 133
(Prokuradoria-Jeral Republika nian)
1. Prokuradoria-Jeral Republika ne’e orgaun boot liu iha Ministeriu Publiku, lei mak defini nia kompozisaun no kompetensia.
2. Prokurador-Jeral Republika mak diriji Prokuradoria-Jeral Republika, no substitui wainhira nia laiha no iha impedimentu ruma karik tuir lei.
3. Prezidente Republika mak nomeia Prokurador-Jeral Republika nian ba mandatu tinan ha’at, ne’ebe defini tuir lei.
4. Prokurador-Jeral Republika hatan ba Xefe Estadu no fo informasaun tinan tinan ba Parlamentu Nasional.
5. Prokurador-Jeral Republika tenki husu ba Supremu Tribunal Justisa deklarasaun inkonstitusionalidade ho forsa obrigatoriu jeral norma nian, ne’ebe hanoin katak inkonstitusional iha kazu konkreto dala tolu.
6. Ajudante Prokurador-Jeral Republika sira hetan nomeasaun, demisaun no ezonerasaun husi Prezidente Republika wainhira rona tiha Konsellu Superior Ministeriu Publiku.
Artigu 134
(Konsellu Superior Ministeriu Publiku)
1. Konsellu Superior Ministeriu Publiku ne’e orgaun ida ne’ebe halo parte integrante ho Prokuradoria-Jeral Republika ninian.
2. Prokurador-Jeral Replublika prezidi Konsellu Superior Ministeriu Publiku no nia kompozisaun ho vogal hanesan tuir mai ne’e:
a) Ida dezignadu hosi Prezidente Republika;
b) Ida eleitu hosi Parlamentu Nasional;
c) Ida dezignadu hosi Governu;
d) Ida eleitu hosi majistradu Ministeriu Publiku sira husi sira nia let.
3. Lei regula Konsellu Superior Ministeriu Publiku nia kompetensia, organizasaun no mos funsionamentu.
KAPITULO III
ADVOKASIA
Artigu 135
(Advogadu)
1. Ezersisio asistensia juridika no judisiaria ne’e interese sosial nian,, ne’ebe advogadu no defensor sira tenki hala’o sira nia knaar tuir prinsipio ida ne’e.
2. Advogadu no defensor sira nia funsaun prinsipal maka fó kontribuisaun ba administrasaun Justisa diak ida, no salvaguarda sidadaun sira nia direitu no interesse lejitimu.
3. Lei maka regula ezersisio advokasia.
Artigu 136
(Garantia ezersisiu advokasia)
1. Estado tenki fo garantia, iha lei nia termu, ba dokumentu sira nia inviolabilidade ne’ebe iha relasaun ho ezersisiu profisaun advogadu sira nian, ne’ebe labele halo revista, prende, rejistu no dilijensia judicial seluk, se Majistradu judicial kompetente ida la iha oin, no se bele, advogadu ida.
2. Advogadu sira iha direitu atu halo komunikasaun pesoal no ho garantia konfidensialidade ho sira nia kliente, espesialmente se kliente sira detido ka dadur hela iha fatin sivil ka militar.
TITULO VI
ADMINISTRASAUN PUBLIKU
Artigu 137
(Prinsipiu Jeral Administrasaun Publiku nian)
1. Administrasaun Publiku hare ba prosekusaun hanesan interese publiku ida, ho respeito ba sidadaun sira nia direitu no interese lejitimu no mos instituisaun konstitusional sira nian.
2. Administrasaun Publiku nia estrutura iha dalan ida atu sees husi burokratizasaun, buka dada besik populasaun sira nian serbisu no kaer metin interesse partisipasaun nian iha nia jestaun efetivu.
3. Lei harii direitu no garantia ba administradu sira, liu-liu kontra atus ne’ebe viola sira nia direitu no interese lejitimu.
PARTE IV
ORGANIZASAUN EKONOMIKU NO FINANSEIRU
TITULU I
PRINSIPIU JERAL
Artigu 138
(Organizasaun ekonomiku)
Organizasaun ekonomiku Timor-Leste nian hatur iha konjugasaun forma komunitaria sira ho liberdade ba inisiativa no jestaun emprezarial no nia koezistensia ba sektor publiku, sektor privadu no sektor koperativu no sosial.
Artigu 139
(Rekursu natural)
1. Rekursu rai leten nian, rai okos nian, bee territorial, plataforma kontinental no zona ekonomiku eskluzivu, ne’ebe importante ba ekonomia, ne’e Estadu nia propriedade ne’ebe tenki utiliza iha forma lolo’os no hanesan, ba ema hotu-hotu ho konkordansia ba interese nasional.
2. Kondisaun atu aproveita rekursu natural sira ne’ebe koalia iha numeru uluk tenki konstitui rezerva finanseira obrigatoriu tuir lei.
3. Aproveitamentu rekursu natural sira tenki haree didiak mos ba ekilibriu ekolojiko no sees husi destruisaun ba ekosistema.
Artigu 140
(Investimentu)
Estadu tenki promove investimentu nasional, no harii kondisaun atu buka hetan investimentu estranjeiru, maibe hola konta ba interese nasional, tuir lei haruka.
Artigu 141
(Rai)
Lei mak regula propriedade, nia uzu no utilidade rai nian, hanesan fator produsaun ekonomiku ida.
TITULO II
SISTEMA FINANSEIRU NO FISKAL
Artigu 142
(Sistema Finanseiru)
Lei mak halo sistema finanseiru nia estrutura atu bele garante formasaun, kaptasaun no seguransa poupansas sira, no mos aplikasaun meiu finanseiru sira ne’ebe presiza ba dezenvolvimentu ekonomiku no sosial.
Artigu 143
(Banku Sentral)
1. Estadu tenki harii banko sentral nasional ida ko-responsavel ba definisaun no ezekusaun politika monetariu no finanseiru.
2. Lei mak defini funsaun no relasaun entre banku sentral, Parlamentu no Governu.
3. Banku sentral iha kompetensia eskluzivo atu halo no fo sai moeda nasional.
Artigu 144
(Sistema Fiskal)
1. Estadu tenki harii sistema fiskal ida ne’ebe fo satisfasaun ba nesesidade finanseira sira no mos kontribui ba distribuisaun justa riku-soin nian no husi rendimentu nasional.
2. Lei mak hamosu impostu no taxa, ne’ebe fixa nia insidensia, benefisiu fiskal sira no kontribuinte sira nia garantia.
Artigu 145
(Orsamentu Jeral Estadu nian)
1. Governu mak halo Orsamentu Jeral Estadu nian, no Parlamentu Nasional mak sei fo aprovasaun.
2. Lei Orsamentu nian tenki preve, ho baze iha efisiensia no efikasia, diskriminasaun reseita no despeza nian, no mos, sees husi dotasaun no fundu sekretu sira.
3. Ezekusaun Orsamentu sei iha fiskalizasaun husi Tribunal Superior Administrativu Fiskal no Kontas no mos husi Parlamentu Nasional.
PARTE V
DEFESA NO SEGURANSA NASIONAL
Artigu 146
(Forsa Armada)
1. Forsa Armada Timor-Leste FALINTIL/FDTL ne’ebe sidadaun nasional deit maka halo parte, sira ne’e mak kaer defeza militar Republika Demokratika Timor Leste nian no nia organizasaun ida ne’ebe uniku ba territorio nasional.
2. FALINTIL/FDTL garante independensia nasional, integridade territorial nian, liberdade no populasaun nian seguransa hassoru agresaun ruma ka ameasa esterna, ho respeito ba orden konstitusional.
3. FALINTIL/FDTL labele iha partidu politiku no rona deit ba orgaun soberanu kompetente sira, tuir Lei-inan no lei, no sira labele mos halo intervensaun politiku naran ida.
Artigu 147
(Polisia no forsa seguransa)
1. Polisia sei defende legalidade demokratiku no garante sidadaun sira nia seguransa internu, maibe sira labele iha partidu politiku.
2. Prevensaun kriminal tenki hala’o ho respeitu ba direitu humanu.
3. Lei maka sei harii regime ba polisia no mos forsa seguransa seluk.
Artigu 148
(Konsellu Superior Defeza no Seguransa nian)
1. Konsellu Superior Defeza no Seguransa ne’e Prezidente Republiku nian orgaun konsultivu ida ba asuntu kona-ba defeza no soberania..
2. Prezidente Republika maka prezidi Konsellu Superior Defeza no Seguransa nian, ne’ebe tenki hatama ema sivil no militar sira, maibe ema sivil maka sei barak liu.
3. Lei maka define Konsellu Superior Defeza no Seguransa nia kompozisaun, organizasaun no nia knaar.
PARTE VI
GARANTIA NO REVIZAUN LEI-INAN NIAN
TITULU I
GARANTIA BA LEI-INAN
Artigu 149
(Fiskalizasaun preventivu konstitusionalidade nian)
1. Prezidente Republika bele husu ba Supremu Tribunal Justisa nian atu halo apresiasaun preventivu kona-ba konstitusionalidade ba naran disploma ida ne’ebe nia simu atu halo promulgasaun.
2. Apresiasaun preventivu ba konstitusionalidade bele husu iha prazu loron ruanulu nia laran, sura hosi loron ne’ebe simu diploma, maibe Supremu Tribunal Justisa nian tenki fo sai iha prazu loron ruanulu resin lima ne’ebe Prezidente Replublika bele habadak tanba urjensia.
3. Iha kazu ne’ebe la tuir Lei-Inan, Prezidente Republika haruka kopia sentensa ne’e nian ba Governu eh ba Parlamentu Nasional, hodi husu no halo foun fali diploma tuir desizaun Supremu Tribunal Justisa nian.
4. Bele hakur tiha vetu tamba inkonstitusionalidade diploma Parlamentu Nasional nian ne’ebe haruka ba promulgasaun, ho adaptasaun loloos tuir Artigu 88.
Artigu 150
(Fiskalizasaun abstratu konstitusionalidade nian)
Bele husu deklarasaun inkonstitusionalidade nian:
a) Prezidente Republika;
b) Prezidente Parlamentu Nasional;
c) Prokurador-Jeral Republika, ho baze iha dezaplikasaun husi tribunal sira iha kazu konkretu tolu iha norma ne’ebe hanoin katak inkonstitusional;
d) Xefe Ministru;
e) Persentajem kintu-ida husi numeru Deputadu sira nian;
f) Provedor Direitus Humanus no Justisa nian.
Artigu 151
(Inkonstitusionalidade tamba omisaun)
Prezidente Republika, Prokurador-Jeral Republika nian no Provedor Direitus Humanus no Justisa nian, sira bele hato’o liu ba Supremu Tribunal Justisa atu halolo-tiha hahalok-ruma ne’ebe la tuir medida lejislativu nian atu bele konkretiza loloos norma-sira lei-inan nian.
Artigu 152
(Fiskalizasaun konkreta kona-ba konstitusionalidade)
1. Hato’o rekursu ba Supremu Tribunal Justisa nian hodi halolo-lian kona-ba lia ne’ebe hakotu ona iha tribunal sira:
a) ba sira ne’e lakohi atu hala’o norma ruma ho fundamentu katak la iha konstitusionalidade;
b) ba sira ne’ebe hala’o norma ruma maibe iha prosesu nia laran mosu inkonstitusionalidade.
2. Atu halolo-lian tuir alinea b), hosi numeru liu-ba ne’e, bele halolo-de’it ho lian klaran ba lia ne’ebe la tuir duni Lei-Inan haruka.
3. Lei maka regula kona-ba oinsa atu simu rekursu sira.
Artigu 153
(Lia-kotun Supremu Tribunal Justisa nian)
Lia-kotun iha Supremu Tribunal Justisa nian, sei la husik liu de’it lia ruma ne’ebe to’o ba, no sei publika hotu kedas iha jornal ofisial, sei tahan karik ho forsa obrigatoriu jeral iha prosesu ba fiskalizasaun abstratu no konkretu, wainhira hato’o lian la tuir duni Lei-Inan haruka.
TITULU II
REVIZAUN LEI-INAN NIAN
Artigu 154
(Inisiativa no tempu Revizaun nian)
1. Deputadu no Bankada Parlamentar sira maka halo revizaun ba Lei-inan.
2. Parlamentu Nasional bele halo revizaun Lei-inan liu tiha tinan neen sura husi data publikasaun ida ikus revizaun lei nian.
3. Iha prazu tinan neen atu halo primeira revizaun ba lei-inan, konta hosi loron ne’ebe Lei-inan tama iha vigor.
4. Parlamentu Nasional, bele asume kbiit atu halo revizaun Lei-inan, wainhira Deputadu barak liu quatro-quintos ne’ebe hala’o sira nia knaar hakarak, independentemente husi naran prazu ida.
5. Proposta ruma kona-ba atu hala’o revizaun ba Lei-inan tenki hatama ona iha Parlamentu Nasional, iha loron atus ida ruanulu nia laran molok atu hahu halo debate.
6. Atu hato’o projetu ruma ba Revizaun Lei-inan, nudar hateten ona iha numeru hirak liu-ba, eh seluk seluk tan, sei bele hato’o duni iha prazu loron 30 nia laran.
Artigu 155
(Aprovasaun no promulgasaun)
1. Atu altera buat ruma ba Lei-inan, tenki hetan apovasaun ho dois terços hosi Deputado sira ne’ebe hala’o hela sira nia knaar.
2. Testu Lei-inan ida foun sei publika hamutuk ho Lei revizaun nian.
3. Prezidente Republika labele rekuza atu promulga lei revizaun nian.
Artigu 156
(Limite ba Materia Revizaun nian)
1. Lei kona-ba halo revizaun nian tenki respeita:
a) Independensia nasional no Estadu nia unidade;
b) Rainain sira- nia direitu, dever, liberdade no garantia;
c) Forma republikana governu nian;
d) Hafahe kbiit nian;
e) Tribunal nia independensia;
f) Multipartidarismu no direitu atu iha opozisaun demokratiku;
g) Sufrajiu livre, universal, diretu, sekretu, no periodiku kona-ba orgaun soberanu sira, nune’e mos ba sistema proporsional nian;
h) Laiha relijiaun ofisial ba Estadu;
i) Prinsipiu ba deskonsentrasaun no desentralizasaun iha administrasaun publika;
j) Bandeira Nasional;
k) Data proklamasaun independensia nasional nian;
2. Alinea c), h) no j) bele iha revizaun husi referendu nasional, tuir lei haruka.
Artigu 157
(Limite sirkumstansial nian ba revizaun)
Wainhira iha-hela “estado de sitio” eh iha emergencia nia laran, labele hala’o revizaun ba Lei-Inan.
PARTE VII
PROVIZAUN FINAL NO TRANZITORIU
Artigu 158
(Tratadu, akordu no aliansa sira)
Konfirmasaun, kona-ba adezaun no ratifikasaun konvensaun, tratadu, akordu eh aliansa bilateral eh multilateral sira nian orgaun kompetente ida-idak mak sei desidi kazu ba kazu, molok Lei-Inan tama iha vigor.
Artigu 159
(Lian serbisu nian)
Lian indonesio no ingles ne’e lian serbisu nian ne’ebe uza iha administrasaun publika hamutuk ho lian ofisial sira, bainhira presiza.
Artigu 160
(Krimi boot sira)
Hahalok sira ne’ebe halo entre loron 25 Abril tinan 1974 no loron 31 Dezembru tinan 1999, ne’ebe bele konsidera nudar krimi hasoru humanidade, nia prosedimentu kriminal tenki hala’o iha tribunal nasional ka internasional sira.
Artigu 161
(Hasai riku-soin la tuir lei)
Hasai riku-soin moveis ka imoveis la tuir lei, ne’ebe halo molok Lei-Inan ne’e tama iha vigor, sei haree tuir nudar krimi no tenki hakotu tuir Lei-Inan no lei-oan haruka.
Artigu 162
(Rekonsiliasaun)
1.Kompete ba Komisaun Simu, Lia-Loos no Rekonsiliasaun nian hala’o knaar ne’ebe UNTAET nia Regulamentu No. 2001/10 fo ba nia.
2.Bainhira presiza, Parlamentu Nasional bele halo fali difinisaun ba kompetensia, mandatu no objetivu sira Komisaun ne’e ninian.
Artigu 163
(Organizasaun judisial tranzitoriu)
1. Instansia judisial koletivu ne’ebe iha Timor Leste, ne’ebe juis nasional no internasional sira integra, ho kompetensia atu halo julgamentu ba krimi boot sira ne’ebe komete entre 1 Janeiru no 25 Outubru 1999 hala’o nafatin ba tempu ne’ebe presiza duni atu remata prosesu sira ne’ebe halo hela investigasaun ba.
2. Organizasaun judisiariu ne’ebe iha Timor Leste laran bainhira Lei-Inan ne’e tama iha vigor sei la’o nafatin to’o wainhira sistema judisiariu foun harii no hahu nia knaar.
Artigu 164
(Kompetensia tranzitoriu Supremu Tribunal Justisa nian)
1. Wainhira Supremu Tribunal Justisa nian hahu tiha ona nia knaar maka sei dauk harii tribunal hirak ne’ebe temi sai iha Artigu 129, Supremu Tribunal Justisa nian ho tribunal jurisiaria sira maka sei kaer kompetensia ne’e.
2. To’o loron ne’ebe Supremu Tribunal Justisa nian harii no hala’o ona nia knaar, Instansia Judisial Boot liu iha organizasaun judisial ne’ebe iha Timor-Leste laran maka sei hala’o poder sira ne’ebe Lei-Inan fo ba tribunal ne’e.
Artigu 165
(Direitu ida uluk)
Lei no regulamentu sira ne’ebe hala’o hela iha Timor-Leste sei aplika nafatin, bainhira sira la iha alterasaun ka revogasaun ba sasan hotu-hotu ne’ebe la kontra Lei-Inan no prinsipiu sira ne’ebe konsigna iha nia laran.
Artigu 166
(Transformasaun Asembleia Konstituinte nian)
1. Asembleia Konstituinte fila-an ba Parlamentu Nasional ho aprovasaun husi Republika nia Lei-Inan.
2. Parlamentu Nasional iha nia mandatu ba dala uluk, esepsionalmente, ho Deputadu na’in ualunulu resin ualu.
Artigu 167
(Eleisaun prezidensial 2002 ninian)
Prezidente Republika nian, ne’ebe hili tuir UNTAET nia Regulamentu No. 2002/01, sei kaer kompetensia no halo tuir mandatu ne’ebe mai iha Lei-Inan.
Artigu 168
(Lei-Inan tama iha vigor)
Republika Demokratika Timor-Leste nia Lei-Inan tama iha vigor iha loron 20 fulan Maiu tinan 2002
